Klube Portu Taibessi Fo Kontratu Ba Jogador Na’in-26
Imajem Klube asina kontratu ho Jogador
SAPNewsTL, Dili: Klube Porto Taibesse fo ona kontratu ba jogador sira hamutuk nain-26 durante fulan rua nia laran kompostu jogador estranjeiru nain haat husi Indonesia no lokal nain-22 ne’ebe prontu reforsa klube hodi kompete klube ualu seluk iha divizaun dahuluk Liga Timorense epoka 2023 sei hahu iha loron 17 fulan fevereiru 2023 no sei remata iha 30 fulan abril 2023.
“Ohin ami fo ona kontratu ba jogador hamutuk nain-26 kompstu husi estranjeiru nain haat husi Indonesia no ita nia jogador lokal nain-22 bazeia ba ita nia jogu divizaun dahuluk Liga Timorense epoka 2023 ne’ebe sei lao durante fulan rua deit tuir koordansia klube, orgaun LFTL ho FFTL ne’ebe ami fo asina kontratu ho jogador sira durante fulan rua mos”, dehan manajer klube Porto Taibesse Charles Guterres ba jornalista SAPNewsTL iha edifísiu klube nian Taibesi, Dili segunda (13/02/2023).
Imajen: manajer klube Porto Taibesse Charles Guterres
Charles hatutan, Kontratu ona ho jogador hanesan dalan sira kesi no fo fiar ba jogador sira ne’e katak sira sei luta duni ho fuan ba klube ida ne’e iha divizaun dahuluk Liga Timorense epoka 2023 maibe bainhira jogador sira ne’e la hatudu performa diak tuir fali mai sira sei la fo tan kontratu tanba fo impaktu boot ba klube.
Entretantu klube Porto Taibesse mak sei hala’o jogu abertura kontra Aitana FC iha loron 17 fulan fevereiru tinan ne’e iha tuku 16:00 oras Timor-Leste iha Estadium Munisipal Dili.