Partidu Republikanu Promete Sei Desenvolve Dili Sai Nabilan

SAPNewsTL, Dili: Partidu Republikanu (PR) hala’o abertura iha Munisipiu Dili, Postu Administrativu Dom Aleixo, Suku Manleuna, Aldeia Lariguto promete ba militante no simpatizante hotu-hotu katak wainhira povu tau fiar ba partidu PR sei hala’o dezenvolvimentu iha kapital Dili sai nabilan.

Tuir Prezidente Partidu Republikanu (PR) João Saldanha katak sidade Dili mak hanesan odamatan ba vizitante sira tanba ne’e tenke garante ambiente ne’ebé moos no hadia fatin turistiku sira ne’ebé iha inklui mos estrada tenke di’ak.

“Ita nia kapital Dili sai odamatan ba vizitante sira, tanba ne’e ita tenki halo kapital Dili ne’e tenki nabilan, estrada tenke di’ak, eletrisidade, uma tenke iha urbanizasaun, hadia fatin turismu, hadia ambiente tenke moos iha Sidade Dili”. Prezidente Partidu Republikanu (PR) João Saldanha ba jornalista sira iha Manleuana-Dili, Sexta-Feira, 21/04/2023

Prezidente Partidu ne’e hatutan presiza hadia seitor sira hanesan sentru politiku, sentru administrasaun no sentru turismu, sentru edukasaun, sentru dezenvolvimentu nasional, ida ne’e mak Sai hanesan planu prioridade ba partidu PR ninia iha mandatu ne’e, tanba kapital Dili mak sai odamatan ba mundu

“Kapital Dili sai odamatan ba mundu, osan ne’ebe iha labele mesak estadu de’it, maibe tenke dada investor sira atu investe iha ita nia rain,tanba ne’e Dili ita tenki hadia hodi nune’e bele sai hanesan Kapital nasaun nian ne’ebe mak nabilan buat ne’ebe mak prioridade mak ita tenke hadia infraestrutura iha Dili laran ne’ebe mak sai prioridade ba Partidu Republikanu”. Teni Prezidente.

Iha fatin hanesan Kordenador Partidu Republikanu Munisipio Dili Roberto Fernandes husu ba povu no joven sira ne’ebe mak iha Dili laran atu fo konfiansa ba sira atu sira bele implementa programa ne’ebe mak sira fo sai ona iha kampaña sira.

“Vota ba Partidu Republikanu atu nune’e bele trasa planu ne’ebe mak iha,tanba programa ne’e mak hato’o durante halo kampaña, hanesan joven nafatin esforsu aan iha Munisipiu Dili no Munisipio seluk para bele fo fiar ba ami nia Partidu iha eleisaun parlamentar ne’e bele asumi kargu hodi implementa programa ne’ebe mak ko’alia iha kampaña”. Nia informa

Jornalista : Antonio Tilman