Partisipa Iha Workshop Diagnostika, MS Sei Melhoria Sistema Saude Iha TL

SAPNewsTL, Dili: Hafoin partisipa workshop ne’ebe organiza husi Autoriedade Munisipiu de Dili, Ministeiru Saúde liu husi Diretora Jeral Prestasaun Saude, Dra. Odete Viegas da Silva hateten aktividade ida ne’e importante tebes  atu  oinsa bele haforsa sistema  saúde pesoalmente no kuidadu saude populasaun nian

“Atividade ne’ebe halo ona iha Dili, RAEOA no Ermera, ohin aprezentasaun peskiza ne’ebé mak munisipiu Dili hetan, nune’e bele aprezenta iha ne’e atu prepara  ba melloramente iha servisu tuir mai”. Dehan Diretora Jeral Prestasaun Saude, Diretora Odete Viegas da Silvas iha City 8, Manleuana, Tersa-Feira, 20/09/2022.

Diretora ne’e akresenta, planu estratejiku setor saúde 2011 to’o 2030, ne’e sei halo revizaun ba planu ne’e rasik iha 2020-2030, haree prossesu husi kedas 2000 mai, buat balun halo ona maibé balun mos presiza hadia.

“Planu husi Setor saúde ne’e rasik inkorpora ona kazu integradu ida liu-liu atu haree ba prosesaun servisu ne’ebé mak integradu, inkluzivu no kualidade  ida ne’e komitmentu governu nian  liu-liu oinsa profisional saúde sira  atu hakbesik liu tan ba iha prosesaun servisu ne’e ba komunidade”. Tenik Diretora

Nia ne’e hatutan, esforsu barak  Ministeriu halo ona maibé presiza atu hadia di’ak liu tan iha parte kualidade no haree ba failansu ne’ebé iha buka oinsa atu bele hadia  nune’e bele hala’o servisu ho di’ak tanba dalaruma mos ema ida-idak nia hakarak atu bele ba ospital atu hasoru espesialista hodi halo atendementu ba sira.

“Ministeriu Saúde nia papel atu halo mos advokasia  ba iha ita nia komunidade  katak iha nivel postu saude,  sentru saude, ospital referral no ospital nasional, dalaruma ita nia komunidade hakarak liu ospital tanba sira sente katak ospital mak bele atende sira kompletu”. Nia subliña

Iha fatin hanesan,  Sekretáriu Prezidente Munisipiu Dili António Moniz hateten  objektivu husi workshop ne’e atu bele hetan ideia no planu  di’ak ida hodi  implementa iha  munisipiu Dili no munisipiu seluk 

“Ita hodi saúde ne’ebé besik ba individu no partisipasaun komunidade nian, ita kompara ho rejiaun ita mos tama iha progressu, objetivu husi workshop ne’e atu ita hetan ideia no planu diak ba Munisipiu Dili no sira seluk”. Nia salienta

Entretantu, Sekretáriu Munisipiu ne’e mos husu ba servisu saúde sira atu implementa no rezolve asuntu saúde iha munisipiu.

“Husu ba diretores husi Ministeriu Saúde, Xefe Departamentu  no Servisu Saúde Munisípiu atu aproveita planu ne’e hodi implementa no rezolve liu-liu kuidadu saúde primária no saúde familia, programa siska, vizita domixiliariu  no saúde da familia servisu iha sentru saude, postu saúde no servisu iha munisípiu”. Nia hakotu

Jornalista: Aquelina Magalhaes & Antonio Tilman

Editor: Ekipa Editorial