Falesimentu Eis PR Lu Olo, Governu Dekreta Lutu Nasionál To’o 28 Junhu
Imajem : Eis Presidente Republika Francisco Guterres “Lú Olo”
SAPNewsTL, Dili : Konsellu Ministrus hala’o sorumutu estraordináriu iha Auditóriu Kay Rala Xanana Gusmão, iha Ministériu Finansas, Dili, no aprova votu pezar no deside hodi dekreta lutu nasionál ba falesimentu Eis Presidente Republika Francisco Guterres “Lú Olo” husi loron 22 to’o 28 Juñu 2026.
Governu liu hosi Reuniaun Extraoedináriu deside dekreta lutu nasionál no fo votu pezar ba Eis-Prezidente Repúblika Demokrátika Timor-Leste, Prezidente ba Frente Revolucionária de Timor-Leste Independente (FRETILIN) no figura nasionál Francisco Guterres Lu Olo ne’ebe hakotu iis orseik, 21 Junhu 2026 iha Malásia.
“Lutu nasionál halo iha territóriu nasionál tomak durante loron hitu, hahú hosi tuku 3 lokraik iha loron 22 fulan-juñu to’o tuku 12 kalan iha loron 28 fulan-juñu, ho bandeira nasionál hasa’e to’o ai-riin klaran (meia haste) iha edifísiu públiku hotu-hotu, inklui embaixadas, konsuladus no reprezentasaun sira seluk Estadu nian iha rai-li’ur, no mós iha ró sira Estadu nian”. Sita Portal Ofisial Governo Timor-Leste, Dili,22/06/2026.
Francisco Guterres “Lú Olo” mate ho idade tinan 71, iha Ospitál Prince Court iha Kuala Lumpur, Malázia, iha ne’ebé nia hala’o hela tratamentu médiku intensivu. Nia moris iha Ossú, iha Munisípiu Viqueque, iha loron 7 fulan-setembru tinan 1954.
Lu Olo dedika an no hola parte iha luta libertasaun nasionál, kaer responsabilidade oioin iha rezisténsia durante okupasaun indonézia. Hafoin Konis Santana nia mate iha tinan 1998, nia asume lideransa polítika rezisténsia timorense nian.
Iha tinan 2001, nia eleitu nu’udar Prezidente Asembleia Konstituinte, órgaun ne’ebé responsavel ba elaborasaun Konstituisaun Repúblika. Nia hala’o knaar nu’udar Prezidente Parlamentu Nasionál hosi tinan 2002 to’o tinan 2007 no eleitu nu’udar Prezidente Repúblika iha tinan 2017, kargu ne’ebé nia kaer to’o tinan 2022.
Francisco Guterres “Lú Olo” hetan kondekorasaun ho Kolár Orden Timor-Leste iha tinan 2009, Grande Kolár Orden Timor-Leste iha tinan 2022, no mós Grande Kolár Orden Infante D. Henrique, ne’ebé atribui hosi Repúblika Portugeza iha tinan hanesan, hodi rekoñese ninia kontribuisaun ba Timor-Leste no ba hametin relasoins entre nasaun rua ne’e.
Governu fó omenajen ba membru ida ne’ebé importante iha luta libertasaun nasionál no hato’o sentidu kondolénsia kle’an ba nia espoza, oan sira no membru família sira seluk, ba FRETILIN, no mós ba povu timoroan tomak, hodi rekoñese legadu dedikasaun no servisu ne’ebé Francisco Guterres “Lú Olo” fó ba konstrusaun Timor-Leste ida ne’ebé livre, demokrátiku no soberanu.
