Povu Lakon Fígura Nasionalista & Estadista, Hamutuk Hasa’e Orasaun & Fo Koragem Ba Família

Imajem:

SAPNewsTL, Dili : Hafoin rona novidades tristeza falesimentu saudozu Francisco Guterres Lu Olo, Primeiru Ministru Interinu, Mariano Assanami Sabino reprezenta nonu guvernu konstitusional hato’o sentidu kondolénsia klean ba familia enlutada, ba partidu FRETILIN no povu Timor-Leste tanba lakon heroi nasional ida.

“Horikalan ita rona, novidades tristeza ba ita hotu, ita lakon ita-nia lutador ida ne’ebé hakotu iis iha Malaysia. Ita hotu sei halo lutu nasional ba loron hitu”.

“Ha’u reprezenta guvernu hato’o kondolénsia klean ba familia bo’ot, ba partisu FRETILIN no povu Timor-Leste. Ita hotu sente lakon ita-nia kompatriota, kamaradazen, Komandante”. Dehan Primeiru-Ministru Interinu Mariano Assanami Sabino liuhusi Konferénsia imprensa iha Palasiu Guvernu, Segunda-Feira, 22/06/2026.

Governante ne’e husu ba povu Timor-Leste hodi nafatin hasa’e orasaun no fo korajen ba familia liu-liu oan sira.

“Ita hotu sente lakon no ita hotu nia orasaun importante, fo korajen ba familia no oan sira para mantein firme estuda no aprende nafatin hodi hakat nia aman nia ain fatin”. Assanami sublinha

Primeiru Ministru em Ezersisiu ne’e dehan, “Governu fo orientasaun ba lideransa ministru nian atu organiza voo espesial, ita uza ita-nia aviaun Aero Dili no uza mos ita-nia bandeira RDTL, aviaun ne’e aluga espesial, familia no mate isin saudozu mak sei sa’e mesak”.

Ministru Asuntu Kombatentes Libertasaun Nasionál Gill da Costa Monteiro Oan Soru sente lakon lideransa lutador ida ne’ebe oferese an ba Timor-Leste nia independénsia durante tinan ruanulu resin-haat (24), nunka hakruk ba politika invazor to’o Timor hetan ukun rssik aan.

“Hanesan veteranus sente lakon lideransa ida, lideransa ne’ebé maka luta durante tinan ruanulu resin-haat hamutuk ho ninia povu nunka hakruk ba politika invazor sira nian to’o Timor-Leste ninia independensia”.

“Matebian, Maun Lu sofre moras ba halo tratamentu no aban halo fulan ida, nia sai husi Dili iha loron 23 fulan Maiu no horkalan ita rona notisia oin seluk. Ita hotu laos Maromak ida-ne’e distinu no Maromak mak hatene”. nia sublinha

Oan Soru hatutan, Ministeriu Asuntu Kombatentes Libertasaun Nasionál (MACLN) sei responsabiliza mate isin saudozu Francisco Guterres Lu Olo hosi Malasia ho aviaun Aero Dili to’o  Timor-Leste.

“MACLN sei responsabiliza mate isin saudozu Francisco Guterres Lu Olo hosi Malasia ho aviaun Aero Dili to’o  Timor-Leste ne’ebe sei tula saudozu nia kadaver hamutuk ho familia ne’ebe akonpanha”.Nia informa

Oras ne’e Kadaver Francisco Guterres Lú Olo sei iha Mortuáriu Ospitál Prince Court, iha Kuala Lumpur, Malázia no iha ona komunikasaun entre familia ho governu hodi translada mai Timor-Leste ho Aero Dili.

‎Saudozu Franciaco Guterres Lu Olo ninia partida ne’e reprezenta lakon boot ida ba família boot, ba partidu FRETILIN, ba ninia kompañeiru luta sira, no ba sira hotu ne’ebé partilha hamutuk mehi no harii Timor-Leste ida ne’ebé livre, demokrátiku no soberanu.

‎‎Familia husu povu Timor-Leste atu hamutuk iha orasaun no fó omenajen ba ninia memória, legadu, no dedikasaun tomak nia fo ba povu timorense.