Portugal : Lider CPLP Hamutuk Ho PM Xanana Presta Omenajen Ba Saudozu Lu Olo
Imajem: Lider Comunidade dos Países de Língua hamutuk ho Primeiru-Ministru Kay Rala Xanana Gusmão, presta omenajen no hato’o sentidu respeitu bá saudozu eis Prezidente Repúblika Timor-Leste, Francisco Guterres Lu-Olo, iha Rua de São Mamede 21, Lisboa, segunda 22/06/2026. Foto: Média-GPM
SAPNewsTL, Portugál: Lider sira hosi Komunidade Nasaun Sira Lían Portugés (CPLP) presta omenajen no hato’o sentidu respeitu bá saudozu eis Prezidente Repúblika Timor-Leste, Francisco Guterres Lu-Olo, ne’ebé fila ona bá Aman Maromak Nia Kadunan Santu.
Omenajen ne’e realiza antes hahú reuniaun durante vizita kortezia Primeiru-Ministru Timor-Leste, Kay Rala Xanana Gusmão, bá Sekretariadu Ezekutivu CPLP, iha Rua de São Mamede 21, Lisboa, segunda 22/06/2026.
Molok hahú enkontru formál, Sekretária Ezekutiva CPLP no embaixadora Angolana, Maria de Fátima Monteiro Jardim konvida partisipante sira hamrik no halo minutus respeitu ida bá eis Xefe Estadu Timor-Leste ne’ebé durante nia lideransa kontribui mós bá fortalesimentu relasaun entre Timor-Leste
ho komunidade luzófona.
Iha oportunidade ne’e, líder sira CPLP nian hato’o sentidu solidariedade no konsiderasaun bá povu Timor-Leste no família enlutada, rekoñese Francisco Guterres Lu-Olo nu’udár líder ida ne’ebé dedika nia-an bá servisu públiku no dezenvolvimentu nasaun.
Vizita Primeiru-Ministru bá Sekretariadu Ezekutivu CPLP realiza iha kontestu hametin kooperasaun no relasaun entre Timor-Leste ho organizasaun luzófona ne’e.
Iha vizita ne’e, Primeiru-Ministru Xanana Gusmão akompaña hosi Ministru Justisa, Sérgio da Costa Hornai; Ministra Edukasaun, Dulce de Jesus Soares; Embaixadora Timor-Leste bá CPLP, Natália Carrascalão; Xefe Gabinete Primeiru-Ministru, Elizabeth Exposto; no Inês Araújo Gonçalves.
