Traballador 242 Sei Aranka Ba Australia, Tarjetu Tinan Ne’e Sei Simu To’o 2500

SAPNewsTL, Dili: Sekretáriu Estadu Formasaun Profissional no Empregu (SEFOPE) liu husi  Diresaun Nasional Empregu Exterior (DNEE) hamutuk ho Vise Prezidente Parlamentu Nasional hala’o serimónia despedida no asina deklarasaun entre familia traballador ho SEFOPE kona-ba joven Timor oan nain 242 ne’ebé sei ba servisu iha Austrália.

Tuir Direktór Diresaun Nasionál Empregu Exteriór Filomeno Soares katak serimónia ne’e halo nu’udár komprimisiu ida atu parte familia no governu responsabiliza wainhira akontese problema.

 “Serimónia despedida nó asina deklarasun, hanesan komprimísiu ida ne’ebé família halo katak, aseita ita nia oan, fen ka la’en atu ba servisu iha Australia, la’os governu maka obriga, nune’e mosu problema ruma parte rua iha hotu responsabilidade hodi rezolve”. Dehan Direktór Diresaun Nasionál Empregu Exteriór (DNEE) Filomeno Soares ba jornalista iha salaun  Timor Logde Comoro, Kinta-Feira,22/09/2022.

Entretantu, Direktor ne’e hatutan, Joven Timor oan nain atus rua haat-nulu resin rua (242) ne’e kompostu husi feto nain 72 no mane ema nain 170, iha ne’ebé ema na’in 15 sei ba servisu iha kompaña Madec/Mason Bros, Perfection Berries ema na’in 22, nain iha 19 ADCO/The Job Shop, iha Koala Farms ema nain 8, nain 8 iha Madec, Connect Group ema na’in 119  no kompaña Midfield Group nain 43.

Iha fatin hanesan, jerente Programa Pauys Pasific Australia Labour Mobility Scame Maria Braz hateten mobilidade programa ba Australia tinan 2 taka tiha ba Timor Leste  no iha fevereiro mak komesa simu fali pedidu husi empregador sira.

“Ami komesa simu fali pedidu husi empregador sira husi Fevereiru to’o agora mensiona mobiliza Mil Sete Centos e Vinte (1720) traballador no fim de ano ami nia prosesaun bele to’o Dois Mil Quinentos (2500), no mos servisu maka’as husi SEFOPE konvese empregador sira mai foti Timor oan sira  hodi konsege respostas ba sira nia nesisidade”. Tenik Jerente Maria

Jerente ne’e mos husu ba timor oan sira atu hatudu komportamentu ne’ebé di’ak atu bele hamorin ita nasaun nia naran iha mundu.

 “Husu ba traballador servisu ho laran, komportamentu di’ak, imi fila sira sei mai foti fali imi no lori tan sira seluk ba tan no imi mos tenke haree malu atu nune’e hodi hamorin ita nia nasaun nia naran”. Nia hatete

Nune’e mos, traballadora Maria de Fatima sente kontente tanba nia bele hetan oportunidade ba servisu iha Australia.

“Ha’u sente kontente tebes wainhira ha’u ba servisu iha Australia, agora daudaun ha’u atu ba servisu ne’e mak naran nase fore ku’u has, oportunidade ne’ebé mak mai ne’e todan ga kaman ne’e simu de’it importante mak ita tenke kuidadu ita nia an no saúde ne’e mak importate”. Nia informa

Tuir planu, traballador nain 242 ne’e sei aranka ba iha Australia iha loron 3 fulan Outobru tinan 2022.

Jornalista: António Tilman

Editor: Aleixo Ximenes