Fasil Ba Ita Halo Diak Ba An, Difisil Halo Diak Ba Ema Seluk

Sapnewstl. (Ai-Mutin, 10-04-2022) : Sarani Parókia Ai-Mutin rihun ba rihun partisipa iha festa solenidade domingu ramos orseik, iha omilia Pe. Emanuel Lelo Talok, Cmf hateten, semana santu sei lori ita ba paskoa, paskoa katak ita sei liu husi terus no susar oioin molok ita hetan salvasaun moris nian husi nai maromak. kuandu imi halo diak, halo deit labele sukat, ema se halo diak no haraik an, maromak sei foti ass nia, basá ema ne’ebe halo diak ne’e nakonu ho sakrifisiu.

Iha omilia Padre Selebrante hatete,  Iha Livru Isaias Kapítulu Lima-Nulu nian ita haree momos katak iha tempu uluk kedas, hakerek no dehan nanis ona kona ba ema ida naran Jesus, katak nia nu’udar atan maromak nian nia halo hahalok diak hodi soi no salva ema hotu, nia sei la ses no la hakiduk ba saida deit mak nia hasoru iha mundu ne’e.

Iha tinan ida ne’e uma kreda Diocese de Dili deklara kona ba Eukaristia no Ekologia. Eukaristia mak wee-matan moris nian, se imi badinas ba mai misa ne’e diak no kmanek, involve an iha grupus kategoriais sira hanesan Grupu Koral, Akólitos, Ths-Thm, Joven ba Kristu, no grupu sira seluk tan ne’e importante. Imi tenki mantein la’o labele ses an iha dalan klaran. Ekologia katak ita presiza hadomi ambiente, proteze no kuidadu ita nia enviromentu, katak labele tesi ai arbiru no soe foer arbiru tanba sei fo ameasa ba ita nia saúde.

Padre Selebrante ne’e hatutan, ohin iha segunda leitura iha Saun Paulo nia surat iha Filipe hateten, jesus nu’udar maromak oan nia haraik an no la foti an, haraik an simu terus oioin, hetan kastigu, hewai no mate iha kruz, tanba atu lori salvasaun ba mundu.

Ohin iha Sidade Jerujalem, ema barak simu nia ho haksolok boot no hakilar dehan nia liurai, nia ne’ebe sei simu teruz no mate iha kruz, liu husi sakrifisiu ne’e nia bele salva ita no ita bele hetan moris ba nafatin. Tenik Pe, Emanuel Iha Omilia. Ai-Mutin, 10-04-2022

Iha evanjellu ohin, amostra mai ita katak, jesus la sala, maibe nia mak sei mate ba ita, nia pronto mate iha kruz, ninia mate fo mai ita salvasaun, perdaun no liberdade lolos. Nune’e mensagem importante ba imi hotu mak ne’e, Ba halo diak, halo diak halo deit, labele hein ema seluk nia suporta, se imi bele, halo bá, basá diak ne’ebe imi halo sei fo grasa, esperansa no ksolok ba ema seluk. Hatete nia Padre Paroku Ai-Mutin.

Karik imi ruma halo aat, hakribit tiha sala hirak ne’e, atu halo diak ba ita nia an rasik ne’e fasil, maibe difisil halo diak ba ema seluk, so ema ne’ebe haraik an, iha domin no pasiénsia mak bele halo diak ba beibeik ba maun alin sira.

Nain Jesus Kristu ita bolu dehan Bom Pastor, maibe iha Livru Testamentu foun dehan Grande Pastor ka Bibi Atan Boot, tanba nia halo diak, beibeik ba nafatin nunka trava ho halo diak, maibe ita ema dala barak ita halo diak ohin, aban ita halo sala, bairua ita halo diak, baintolu ita halo sala fali.

Mai ita aprende husi nain Jesus Kristu, Halo diak ba beibeik, ema se halo diak beibeik, nia sei sai ema diak no boot liu. Nain Jesus ninia prontidaun ba mate, ne’e nia hakarak ita hetan diak no moris ksolok, laiha belun ida boot liu fali, belun ne’ebe saran nia moris ba mate tanba atu salva nia belun sira, nia maka Jesus Kristu maromak nia oan mane ne’ebe ohin tama ona iha sidade boot jerujalem. Pe, Emanuel Afirma.

Entretantu, Nia realça tan katak, Mai ita hotu fila ba maromak, halo diak iha liur tama ba uma laran, hanoin diak iha laran, halo diak iha liur, diak iha laran no diak liur ba nafatin. Dala ruma ita kolen hodi halo diak, nune’e mos ohin iha salmu ita kanta katak ‘ha’u nia maromak, ha’u nia nain, tansá ita hewai ha’u’, dala barak ita halo diak, ema la valoriza, la respeita, la konsidera, maibe ita labele hein sira nia hahi no foti aas ita, labele para ho hahalok diak sira. Tanba maromak hatene nia sei foti aas ita no lori ita ba fatin aas liu, bensaun maromak nian ba imi hotu. Dehan Pe. Emanuel Lelo Talok iha nia Omilia, Aimutin, 10 Abril 2022. Jornalista Sergio Delekuar

Jornalista : Sergio Delekuar

Editor     :  Anna Alela Ramos