PERMATIL Susesu, Hamoris Bee-Matan Antigu 33 Iha Likisa
SAPNewsTL,Likisa- Permakultura Timor Lorosa’e (PERMATIL) no Water Aid konsege implementa programa konservasaun be’e iha suku Loidahar postu administrativu Likisa Villa, munisipiu Likisa hodi hamoris fila ba be’e matan antigu hamutuk 33.
Tuir Chefe Suku Loidahar Domingos dos Santos hateten programa konversaun be’e ne’e diak tebes tanba liu husi programa ne’e bele halo travasaun kadalak 65, debu 11 no bele konserva be’e matan.
“PERMATIL hahu implementa ninia programa konservasaun be’e iha tinan 2022, ninia progresu diak tebes iha ami nia suku, tanba liu husi implementasaun programa konservasaun be’e iha suku Loidahar, Travasaun Kadalak hamutuk 65 debu hamutuk 11 aleinde ida ne’e halo mos konservasaun ba be’e matan sira.”Dehan Xefe Suku Loidahar Domingus dos Santos ba jornalista SAPNewsTL iha Suku Loidahar,Kuarta-feira(27/03/2024).
Sefe suku esplika katak progressu husi programa ne’e maka debu no kadadak sira ne’e, konsege fo ona rejultadu ba be’e matan sira ne’eba maka ezisti hela iha suku Loidahar aumenta kuantidade be’e no hamosu fila fali be’e matan foun lubuk ida.
“Be’e matan antigu sira ne’ebe be’e maran tinan naruk kontinua moris fila fali, total be’e matan moris fila fali 33, no be’e matan ne’ebe durante eziste hamutuk 24, Husi be’e matan foun 33 ne’e komunidade sira hahu dada ba sira nia uma”.Nia informa
Chefe suku mos husu ba komunidade no joven sira ne’ebe maka pertense iha suku refere tenke badinas atu kontinua koserva be’e matan sira, ho rajaun ida katak ema moris hotu presija konsumu be’e.
“Tinan ida ne’e ita bele produs ema atus ida husi suku, maibe ita nunka produs be’e matan ida husi suku, entaun be’e matan oituan populasaun barak, konflitu sosial kontinua mosu tamba ita hadau malu be’e. oinsa maka ita hamutuk bele konserva be’e atu nune’e bele aumenta kuantidade be’e, ita hotu bele uja ba ita nia nesesidade lor loron”.
“Atu asegura Debu, travasaun no be’e matan sira la bele hetan estragus husi animal no komunidade sira, Presija implementa lei tradisional ho rigoroju atu komunidade hotu obdese ba lei hirak ne’e”Nia informa
Enkuantu, Chefe Suku Loidahar Domingos Dos Santos mos informa ba liurai suku sira seluk atu hare didiak sira nia kompetensia hodi ezekuta servisu bazeia ba lei No 9/2016.
Programa ida ne’e foin implementa iha suku rua, xefe suku mos rekomenda ba NGO PERMATIL no Water Aid hodi bele expanda programa refere ba 23 suku iha munisipiu Liquiça.
Jornalista : Anina Martins