Pertamina Internasionál Apoia FMCTL Realiza Road Race 2023
SAPNewsTL, Dili: Pertamina Internasional Timor kolabora Federasaun Motosiklizmu Timor-Leste (sigla Portugues FMCTL) realiza Road Race 2023 Komemora Loron FALINTIL ba da-48 tanba hakarak hamosu raider sira husi Timor-Leste bele ba kompete iha eventu internasional.
“Ami hakarak fo obrigadu ba FMCTL bele halo kolaborasaun ho Pertamina Internasional Timor realiza Road Race ne’e hodi komemora loron FALINTIL ba da-48 ho esperansa bele hamosu raider sira husi Timor-Leste bele ba kompete iha eventu internasional sira no dudu raider joven foun sira ba kompete eventu boot sira”, dehan Diretor Prinsipal Pertamina Internasional Beny Harto Wijaya ba jornalista sira liu husi konferensia imprensa iha nia knaar fatin Pantai Kelapa, Dili kinta (17/08/2023).
Diretor Prinsipal hatutan, sira agora iha liafuan ida dahuluk no sempre ba povu Timor-Leste nune’e sira halo kolaborasaun ho FMCTL realiza Pertamina Internasional Timor Road Race 2023
Eventu ne’e sei komesa iha loron 18 to’o 20 fulan agostu 2023 iha Tasi Tolu kompete husi raider nasional ho internasional atu ida resin inklui 30 mai husi Indonesia.
Iha fatin hanesan Vise Presidente FMCTL Helder Vieira hatete, sira husi komisaun organizador hakarak agradese ba governu hamutuk ho patrosinador sira suporta sira realiza Road Race 2023.
“Ami husi Komisaun Organizador hakarak fo agradese ba patrosinador sira liuliu ba governu liu husi Ministériu Juventude Desportu Arte Kultura (MJDAK) hamutuk ho patrosinador prinsipal Pertamina Internasional Timor ho Haksolok Group”.
“Agradese ba Mandiri Timor-Leste, Yamaha, ESM, Brother Motor, Maxxis Tires, JDL 89, MAX ADS, Novo Turizmo, Jenic, Zefra, Chrame Unipessoal Lda, Grafika Taliti, SM, HV Store no HF tanba suporta ona FMCTL realiza Road Race ne’e hodi dezenvolve atleta halai motor sira iha Timor-Leste”, tenik Helder
Helder informa tan, total raider sira rejistu iha komisaun organizador ekipa 25 husi Timor-Leste no hitu husi Indonesia total raider atus ida resin inklui ema nain-30 husi Indonesia kompete iha klase 21, kada klase sei kompete husi raider minimu nain-10 masimu nain-40.
Nia afirma tan, orsamentu FMCTL Aloka ba Road Race 2023 ne’e ho montante 40,000 USD husi MJDAK apoiu 20,000 USD hamutuk ho patrosinador sira nune’e sira sei fo premiu ba manan nain sira husi klase 21, kada ida manan nain dahuluk to’o dalimak mak hetan premiu.
Reportajen: Augusto dos Santos