PM Xanana Fo Agradese Ba APHEDA
SAPNewsTL,Dili : Hafoin Hala’o Sorumutu, Primeiru-Ministru, Kay Rala Xanana Gusmão hato’o agradese ba apoiu solidaridade hosi Syndicate Aid Abroad- Australian People for Health, Education and Development Abroad (APHEDA) durante funu fó apoiu solidaridade makas ba povu Timor-Leste nia luta.
Primeiru-Ministru, Xanana informa Sindikatu Traballadór ho povu Australiano lubuk ida defende Timor-oan nia direitu, iha funu laran, iha ai-laran ho problema oioin, maibé sira la lakon esperansa, apoia nafatin Timor-Leste.
“Grupu ida ne’e (Syndicate Aid Abroad- APHEDA no mós Sindikatu Autrália seluk ) uluk sira mak ajuda ita iha ho difikuldade oi-oin tanba hatene katak sira iha ita-nia kotuk maka halo ita konsege tahan hodi nune’e ita bele mai to’o iha iha referendum tinan 1999″.
“Ita hotu hatene Governu Australianu hatene mós governu rai sira seluk nian sein solidariedade hosi Sosiedade Austrália no internasionál sosiedade ne’e nian defisil liu ba ita atu hetan ukun-an tanba ne’e ha’u agradese tebes ba sira,” informa PM ba jornalista, hafoin enkontru ho Reprezentante Union Aid Abroad-APHEDA no delegasaun iha salaun enkontru Gabinete Fronteira Marítima, Palasiu Governu, Dili,07/08/2023
Xanana orgullu, mezmu Timor-Leste ukun aan ona, maibé grupu ne’e kontinua lolo liman, kari domin apoiu nafatin povu Timor-Leste no hametin relasaun servisu.
“Lori povu nia naran, ha’u hato’o obrigada wain, ami hadomi imi,” tenik PM
Iha fatin hanesan, Reprezentante Union Aid Abroad-APHEDA, Lori-anne Sharp hato’o agradese hasoru direita Primeiru-Ministru, Kay Rala Xanana Gusmão hodi felisita ba kargu no dezeja susesu durante mandatu.
“Ami hasoru malu ho Primeiru-Ministru, no enkontru di’ak, ami sente previleiju boot mai iha imi nia nasaun. Obrigadu wain ba imi nia jenerozidade no ami haree ba oin oinsá atu kontinua ami-nia amizade no solidaridade ho Timor-Leste,” Lori-anne Sharp agradese.
Reprezentante Delegasaun Australian Union Movement ne’ebé reprezenta traballadór na’in millaun 1.5 ho Xefe Governu Xanana deskute mós kooperasaun servisu ba futuru.
“Ami mós ko’alia kona ba relasaun iha futuru, no kona ba oinsá mak ita bele servisu hamutuk iha futuru, no saida mak Austrália bele fó ajuda no kontinua ita-nia amizade no lasu ne’ebé mak iha ona,”nia garante.
Iha enkontru ne’e, Sindikatu Traballadór Austrália ho Xefe Ezekutivu ne’e ko’alia mós kona-ba biodiversidade no kresimentu ekonomia Timor-Leste. Enkontru amizade ne’e termina ho tara tais, entrega livru no entrega kamiza hosi parte rua nu’udar pasu hodi hametin kooperasaun servisu
Reportazen:Lidia Amaral