PN Husu Seguransa Buka Tuir Grupu Kriminozu, Labele Duun Arte Marsiais & Rituais

SAPNewsTL, Dili: Komisaun B Parlamentu Nasional husu autoridade seguransa sira servisu makaas hodi buka grupu kriminozu sira iha kapital Dili ne’ebe ataka no halakon joven sira seluk nia vida.
“Ohin loron ita lahatene timor oan hamutuk hira mak mate ona, mate laos nesesidade mak mate maibe mate la iha nesesidade tan ne’e ha’u husu autoridade tomak hanesan makina ba defeza ho siguransa tenki servisu makaas no funsiona iha servisu nasional no intelijensia hanesan servisu informasaun militar, servisu informasaun polisia, servisu investigasaun polisia nasional ho PCIC buka grupu kriminozu sira iha kapital Dili”, dehan prezidente komisaun B Jose Agostinho Siqueira “somotxo” ba Jornalista sira iha resintu Parlamentu Nasional Dili segunda (09/12).

Prezidente komisaun B hatete, triste tebes iha tinan foun 2023 simu matak malirin fo fresku atu hanoin politika ho siguransa estabilidade no dezenvolvimentu ba iha Timor-Leste maibe kontrariu, triste tebes kuandu hahu tinan foun simu probema grupu kriminozu sira ataka joven sira balun mate no kanek, ida ne’e mak sai preokupasaun ba ema hotu liuliu deputadu sira iha Parlamentu Nasional, sira sei ko’alia iha plenaria sira sei manifesta deskontentamentu konaba situasaun atual maibe nu’udar prezidente komisaun B trata defeza ho siguransa sente triste ne’ebe akompanha komesa situasaun husi loron 01 fulan janeiru 2023.

Nia informa, depois pasajen 2022 tama ba 2023 hanoin situasaun ne’e para deit iha loron 01 fulan janeiru 2023 maibe loron sira tuir mai ne’e nafatin kontinua ida iha Elemloi, ida seluk iha Bidau Ponte habibie, dalaruma mos iha munisipiu sira balun fatin seluk ne’e ema la hatene, tenki iha responsavel ba area defeza no siguransa nian hodi kombate kriminaliza iha rai ne’e, alerta mos ba autoridade seluk analiza ba situasaun tanba situasaun ne’e laos normal ema sira hanesan halo asaun ka oho nee mos laos normal sira nee drogadu ka sira ne’e grupo organizadu atu oho deit ema tamba hare iha elemloi imajen balun ne’ebe mak hare laos dehan organizadu maibe dalaruma mos iha ne’ebe hamosu odiu malu

Deputadu akresenta, imajen ne’ebe mak hatudu iha Bidau Ponte Habibie no ElemLoy nian ne’e odiu malu ema ne’e to’o mai ema ne’e halo kedas asaun ba vitima hodi sona daudaun haree iha imajen ne’e signifika katak ne’e krimi organizadu, ne’e la bele direitamente liga ba iha arte-marsiais ka rituais depois iha analiza ida mak foin dehan arte-marsiais maibe ida hanesan ne’e hanaran nee grupu organizadu krimi nian, ema normal to’o mai hodi sona ka oho kedas ema ‘autoridade sira tenki halo analiza ba situasaun ne’e agora seidauk hatene problema hirak ne’e nia hun mai husi ne’ebe tanba hare husi imajen ne’ebe mak hatudu iha Facebook.

Entretantu, Autor ne’ebe deskonfia sona sidadaun ida iha Ponte Habibie, Servisu Investigasaun Kriminal Nasional (SIKN), Servisu Informsaun Polisia Nasionall (SIPN-PNTL), Servisu Informasaun Militar (SIM-F-FDTL) no Servisu Intelijensia nasional (SIN) asegura ona iha Postu Administrativu Fatuberliu Munisipiu Manufahi hodi lori mai iha Kaikoli hori kalan maiz ou menuz tuku 10.

Portantu pessoa deskonfia oras ne’e daudaun iha ona parte seguransa ninia liman hodi supmete ba prosesu investigasaun durante 72 horas, iha sorin seluk, kazu omesidu iha Elemloi mos parte seguransa asegura ona ema nain lima hodi submete ba prosesu investigasaun, portantu iha tempu badak sei fo sai resultadu autor sira ne’ebe iha indikasaun forte ba aktu krime sira iha kapital dili inklui iha territoriu nasional

Nune’e, fo hanoin mos ba sidadaun hotu iha kapital dili, atu evita la’o iha kalan, evita ransu livre, hemu tua iha dalan ninin no kontrola an nafatin iha tempu no fatin hotu, hodi hadook an husi krime no violensia sira ne’ebe desperadu.

Jornalista : Lidia Amaral
Editor : Augusto dos Santos