Porto Taibesse Sei Esforsu Halakon Academica FC
Imajen: Treinador Porto Taibesse FC Miro Bento
SAPNewsTL, Dili: Porto Taibesse FC sei esforsu manan Academica FC tanba sira hakarak hetan pontu tolu hodi husi pontu zero iha tabela klasifikasaun divizaun dahuluk Liga Timorense epoka 2023.
“Jogu kontra Academica FC hau sei la mudansa barak ba jogador line up tanba hasoru Aitana iha jornada dahuluk divizaun dahuluk Liga Timorense 2023 jogador sira la hatudu performa aat kedas maibe jogador sira mak la aproveita duni oportunidade hodi marka golu maibe jogador adversariu utiliza oportunidade diak hodi marka golu tan ne’e ami derrota tan ne’e ami otimista sei esforsu manan Academica FC hodi hetan pontu tolu”, dehan treinador Porto Taibesse FC Miro Bento ba jornalista sira liu husi konferensia iha Estadium Munisipal Dili sesta (3/03/2023)
Treinador hatutan, nia fo parabens ba Academica FC ne’e manan tiha Aitana FC antes ne’e manan sira iha jornada dahuluk divizaun dahuluk Liga Timorense epoka 2023, Academica FC agora forte tebes ne’ebe sira sei esforsu para hasoru adversariu ne’e.
Miro akresenta, nia respeitu Academica FC agora sira lidera klasifikasaun provizoriu maibe sira sei esforsu manan kontra Academica FC atu nune’e sira hetan pontu tolu sai husi pontu zero agora ne’e, ne’ebe nia fo hatene ona ba jogador sira labele husik oportunidade iha jogu laran se husik ema utiliza fali hodi halo terus sira ne’ebe Porto Taibesse FC otimista hetan pontu tolu hasoru Academica FC iha loron 5 fulan marsu tinan ne’e.
Imajen: Treinador Academica FC Luisinho dos Santos Saco
Iha fatin hanesan treinador Academica FC Luisinho dos Santos Saco dehan, sira nia preparasaun maski difisil tanba jogador sira kole maibe sira otimista hetan pontu tolu tanba nia fiar nia jogador sira
“Ami nia preparasaun difisil oituan ba jogador sira kole tanba horseik ami foin joga hotu maibe ida ne’e obrigasaun orariu jogu nian ami tenki tuir ne’ebe ami preparadu hasoru Porto Taibesse tanba sira ekipa forte maski iha jornada dahuluk lakon maibe jogu daruak sira esforsu para atu manan maibe ami otimista hetan pontu tolu tanba hau fiar hau nia jogador sira” tenik Luisinho
Reportajen: Augusto dos Santos