Preokupa Uza Medsos Desakredita Malu, SECOMS Sensibiliza Literasia Dizital Iha ESTV-GTI

SAPNewsTL, Dili : Sekretaria Estado de Komunikasaun Sosial (SECOMS) Halo Sensibilizasaun Literasia Dizital Iha Eskola Sekundaria Tékniku Vokasional-Grupo de Teknologia Industria ( ESTV-GTI ) Becora, objektivu husi sosializasaun ne’e atu halo kampaña Nasional Kombate Hoax no promove internet saudavél ba Estudante sira.

“Hakarak dezamina informasaun kona-ba oinsa utiliza internet ho saudavél no kuidadu para Ita hotu bele kontribui no kombate Hoax, no lia falsu iha ita nia rai,  guvernu preokupa Kona ba ba Ita nia kondisaun aktual tamba iha área dizital agora ne’e ema hotu-hotu livre uza maibé informasaun barak tama mai, Ema utiliza ba negativu mak barak”. tenik SECOMS Sr. Mericio Juvinal dos Reis Acara ba joranlista iha Escola Secundaria STM Becora Dili Segunda ne’e ( 11/07/2022).

Sr. Mericio Juvinal dos Reis Acara preokupa jovens barak utiliza media sosial hodi hatun malu, tarata malu no desakredita malu, la bandu sira uza plataforma sira no tenki fo hanoin ba sira uza plataforma ne’e ho matenek

“Ita nia joven sira utiliza ba asesu pornografia mak makaas fali no utiliza hodi tarata malu fali, hatun malu,  desakridita malu mak makaas entaun ita hanoin edukasaun sivika ba ita nia estudante sira tanba tuir pesquiza ne’ebé mak iha katak Jovens no Estudante barak mak uza média sosial barak liu hanesan Facebook, Youtube, whatsApp, Tiktok, Instagram,nst. Ita mos la bandu sira uza plataforma sira ne’e Ita mos tenki fo hnaoin ba Sira uza plataforma ne’e ho matenek”. Tenik SECOMS Mericio Juvinal dos Reis Acara

Sekretaria Estado de Komunikasaun Social (SECOMS) Husu ba jovens no Estudante Sira uza plataforma ne’e ho diak tuir nia dalan hodi sai ezemplar ne’ebé di’ak ba familia, sosiedade, eskola no nasaun

“SECOMS mos kria plataforma atu hodi detekta ID falsu, informasaun falsu no informasaun ne’ebé kria plataforma kriminal hanesan ita bele detekta ona ho ema hamutuk atus ida ruanulu (120) Ita mos tenki redúz ho plataforma da ne’e”. dehan nia

Enkuantu, SECOMS mos sei tama sai eskola hotu hodi fo edukasaun sivika ba jovens no Estudante iha Rai laran hodi bele hatene klean liu kona-ba utilizasaun plataforma internet

Entretantu, Director ESTV – GTI Sr. Francisco Guterres sente kontente tebes bele hetan edukasaun sivika husi SECOMS kona-ba Literasia digital

“Pela primeira vez SECOMS ho nia equipa marka ona presenza iha ESTV- GTI halo sosializasaun, sensibilizasaun ne’e bele mai aumenta tan sira nia kuñesimentu hodi kombate Lia falsu iha ita nia rai”. Francisco Guteres

Enkuantu, Director ESTV – GTI Sr. Francisco Guteres mos apresia ba progarma ne’ebé edukativu teb-tebes husi SECOMS, nia husu atu iha kontinuasau bebeik nune’e bele kombate, evita lia falsu sira ne’ebé mak mosu iha sosiedade

Jornalista : Antonio Tilman & Lidia Amaral