SAPNewsTL, Lautem: Assosiasaun Legumau (AS Legumau) realiza aktividade diskursu publiku no sertame iha Suku Baricafa, Postu Administrativu Luro, Munisipiu Lautem hodi selebra aniversariu As. Legumau nian ba dala rua.
Tuir Prezidente As. Legumau Elias Hornay Baptista katak estabelese As. Legumau ne’e inisiativa rasik husi juventude Baricafa nian nu’udar mahon ida ba juventude Baricafa atu konsentra ema hotu ho nia objektivu atu kria unidade, paz no estabilidade hodi konsentra ba dezenvolvimentu País hahu husi baze to’o nasional.
“Assosiasaun Legumau hari’i i atu akumula ema hotu liu-liu ba Baricafa oan sira ne’ebe mak iha rai laran tantu mos iha estaranjeiru, nune’e hamutuk nafatin kria paz no unidade iha Suku, Postu, Munisipiu to’o Nasional hodi konsentra ba dezenvolvimentu nasional”. Dehan Prezidente As. Legumau Elias Hornay Baptista hafoin remata diskursu iha Sede Suku Baricafa, 29/10/2023.
Prezidente As. Legumau ne’e hatutan Asosiasaun Legumau konsentra ba aktividade tolu hanesan edukasaun, desportu no sosial ne’ebe durante la’o ona iha nasional no ohin sira kontinua realiza iha Suku.
‘“Iha aktividade tolu ne’ebe ami halo mak hanesan edukasaun, sosial no desportu, edukasaun nu’udar aktividade prinsipal ida ho nia objektivu atu motiva foinsa’e sira sai matenek liu husi aktividade sertame no kompetisaun diskursu publiku”. Prezidente informa
Iha fatin hanesan, Presidente komisaun organizador ba aktividade diskursu publiku no sertame, Hipolito Moreira informa atividade sertame ho diskursu sira ne’ebe realiza ne’e atu kapasita no mentaliza foinsa’e sira hahú husi Suku to’o ba nasional.
“Ohin ami realiza aktividade hanesan sertame, diskursu publiku no aban dia 30 ami sei hala’o missa agradesimentu ba ezistensia AS Legumau ba dala rua no sei halo aktividade kultural hanesan dada tali ba adultu sira inklui halai karon no atividade kultutal sira seluk ho objektivu atu hametin nafatin ami nia unidade nu’udar Baricafa oan liu husi asosiasaun Legumau”. Tenik Hipolito
Hipolito fundamenta iha âmbito selebra aniversariu ida ne’e konsentra ba atividade edukasaun hanesan sertame no diskursu publiku atu motiva foinsa’e sira hodi bele halo transformasaun ba sira nia mentalidade inklui aktividade kultural sira.
“Husi parte edukasaun nian, ami hala’o sertame no diskursu publiku,liu husi ida ne’e ami bele kapasita juventude sira nia kapasidade no eleva sira nia kualidade iha área edukasaun nomos kultural no desportiva, oinsa para hamoris sira nia talentu iha área desporutu”.
Xefe Suku Baricafa Lamberto Soares sente orgullu no agradese tanba joven sira liu husi As. Legumau bele organiza aktividade sira nu’udar dalan atu bele lori joven sira ba naroman hodi kontribui ba dezenvolvimentu.
“Há’u agradese teb-tebes ba juventude sira, intelektual Baricafa nian ne’ebe organiza aktividade ida ne’e, agradese tanba ita bo’ot sira bele halo aktividade lubuk ida ne’e primeira vez ba Suku Baricafa”,
“Há’u orgullu tanba liu husi aktividade ida ne’e hanesan naroman ida, oinsa ba oin juventude hotu bele muda juventude nia mentalidade atu hamutuk dezenvolve Suku ida ne’e”. Nia hatete
Entretantu, atividade hirak ne’e realiza tanba hetan apoiu finanseiru husi Baricafa oan sira ne’ebe servisu iha estranjeriu hanesan Korea, Australia no Inglaterra inklui sira ne’ebe iha rai laran
