Presidente Angola Sei Vizita TL, Loke Embaixada & Halo Investimentu
Prezidente Repúblika, José Ramos-Horta ho nia omólogu Prezidente Angola, João Lourenço
SAPNewsTL, Brazil :.Prezidente Repúblika, José Ramos-Horta ho nia omólogu Prezidente Angola, João Lourenço segunda-feira liu ba, hasoru malu iha Hotel Royal Tulip Brazília, Objetivu husi sorumutu ne’e ko’alia liu kona-ba kooperasaun bilaterál entre nasaun rua, oportunidade atu halo investimentu iha ASEAN inklui loke Embaixada Angola iha Dili.
“Ministru Negosiu Estranjeiru Angola sei mai vizita Timor iha tempu badak no Prezidente Angola mos hakarak vizita, tanba nunka Prezidente Angola ida mai Timor-Leste no sira sei haré loke embaixada ida”, Haktuir Prezidente Republika José Ramos-Horta hafoin enkontru, Brazil, 02 Janeiru 2023
Kona-ba ASEAN, Xefe Estadu dehan, adezaun Timor-Leste ba ASEAN, sei sai hanesan plataforma investimentu ba nasaun membru CPLP sira.
“Timor-Leste iha tempu badak, 2023, 2024, 2025, bele tama iha ASEAN, bele sai hanesan plataforma ida, para rai sira hanesan Angola, Portugál, Brasil, bele halo investimentu, koloka sira-nia produtu iha Timor-leste, rai sira-ne’e iha meius indústria, bele uza Timor-Leste hanesan plataforma, hodi halo reesportasaun ba nasaun sira iha ASEAN,” fundamenta Xefe Estadu.
Prezidente Ramos-Horta afirma, Timor-Leste bele sai hanesan armajén ba transaksaun produtu hanesan modelu komérsiu ne’ebé Singapura opta, hodi akomoda produtu imporadu husi nasaun seluk.
“Brazil, ha’u husu ba sira loke fábrika medikamentu, Portugál loke fábrika medikamentu, indústria modas, roupa, tanba Portugal ein-termus indústria moda nian, boot teb-tebes iha mundu, halo sapatu ho kualidade, agora Portugál númeru daruak, hafoin Itália no Timor-Leste bele sai hanesan armajén ba produtu sira-ne’e hotu, hodi fa’an fila-fali ba nasaun seluk,” salienta Xefe Estadu.
Tuir Prezidente Repúblika, enkontru ho líder no entidade importante sira iha eventu internasionál sira, hanesan parte integrante iha diplomásia no Timor-Leste tenki ativu liu-tán.
“Ha’u hasoru malu mós ho Vise Ministru Edukasaun Singapura, foin lalais hasoru malu iha Singapura, nia mai Timor-Leste, hasoru malu mós ho delegasaun husi Kambodia, hasoru ho vise Prezidente Kuba mós mai no delegasaun lubuk ida,” tenik Xefe Estadu.
Enkuantu, Estadu Angola hanesan produtor pertroleu, ho kuantidade barril millaun rua kada loron, produtór diamante, osan-mean, karvaun no seluk tan no empreza angolana balun mos investe ona iha Xina no sai proprietária ba rezidénsia andar 20 to’o 30 iha Singapura.
Jornalista : Vinsensius saldanha Morais De Araujo