Natál Lori Espíritu Irmandade, Pe. Augusto : Natál Tempu Hadia An Trava Diskriminasaun

SAPNewsTL, Lautem : Iha selebrasaun solenidade Natál kosok oan Jesus Kristu nia moris mai mundu ne’ebe hala’o iha Parokia Nossa Senhora Ranha dos Apotolos de Luro, iha omilia Padre Selebrante Pe. Augusto Delfim de Sa haktuir Loron Natál lori espiritu irmandade (Maun Alin), ema hotu tenki hakaas an evita diskriminasaun ba malu no labele halo bareira ba malu iha moris ne’e

“Natál ne’ebe lori espiritu irmandade, prezepiu ne’ebe sarani sira hari’i ne’e sai simbolu exterior, ema hotu tenki halo nia fuan sai belem ne’ebe bele lori espiritu irmandade ba malu, labele halo diskriminasaun ba malu, haree malu hanesan maun alin, iha ne’ebe labele halo bareira malu tanba ita mesak maromak nia oan, Jesus Kristu mai moris hamutuk ho ita, iha ita nia fuan”. Tenik Pe. Augusto Delfim de Sa iha nia omilia, Luro, 24/12/2022

Padre Selebrante ne’e konsidera, Ema hotu ne’ebe moris iha mundu ne’e nu’udar imajen maromak nian, imajen ida ne’e presiza fo liman ba malu hodi hatene hadame moris moris iha unidade no fraternidade

“Ita ema nu’udar imajen maromak nian, ita tenki fo liman ba malu, fo dame ba malu, hadomi malu, tulun malu, kuidadu malu, servi malu hahu husi familia, sosiedade no nasaun”. Nia Hateten

Pe. Augusto konsidera mensagem paz sai halerik ba sosiedade Timor ohin loron, maske nune’e, maibe la halakon esperansa ema nian iha moris ema nian

“Mensagem Paz ka Dame sai halerik ba komunidade ohin loron, maibe la’os halakon ita nia esperansa, la’os halo ita iha nakukun laran, momentu natal ida ne’e halo ita nia orienta ita nia an, hadia an no hakaas an la’o tuir maromak nia hakarak, paz tenki sai ita nia kultura no tradisaun iha ita nia moris”. Dehan nia

Enkuantu, Tuir observasaun SAP News Timor Leste iha terenu nota katak partisipasaun sarani iha misa natal kalan no dader la’o ho iha paz, hakmatek no heta seguransa husi eskuarda PNTL Postu Adminitrativu Luro, Munisipiu Lautem

Jornalista : Ekipa Kobertura