Projetu 49 Seidauk Konklui ! SEDL Husu Finaliza Lailais
SAPNewsTL, Dili: Sekretariu Estadu Dezenvolvimentu Lokal (SEDL), Mateus Wilfredos dos Santos Tallo, konvoka reuniaun ho Diresaun Jeral Desentralizasaun Governu Lokal, no Diresaun Nasional Apoiu implementasaun Planeamentu e dezenvolvimentu Integradu Munisipal (PDIM). Objetivu husi reuniaun ne’e maka atu halo avaliasaun ba progresu Implementasaun Projetu PDIM, tinan 2021 -2023 iha Munisipiu 13 inklui RAEOA.
Tuir Sekretariu Estadu Dezenvolvimentu Lokal (SEDL) Mateus Wilfredos dos Santos Tallo katak, papel Governu nian maka tau importansia ba eleborasaun planu apoiu dezenvolvimentu Munisipial, planu Apoiu dezenvolvimentu komunitariu no efisensia ba formasaun Administrasaun poder lokal.
“Ita tenke dezenvolve didiak politika lubuk ida, no dokumentus sira ne’ebe ita presiza hare didiak, liu liu governu aloka tiha ona osan, maibe projetu seidauk la’o, tanba ne’e ita tenke buka didiak nia fukun ne’e iha ne’ebe, no tanba sa maka osamentu ne’e alokadu tiha no ikus mai projetu la la’o,”dehan SEDL, Mateus Tallo, iha salaun INAP Comoro.
Nia afirma tinan oin orsamentu foun, tanba ne’e tenke la’o ho buat foun, projetu sira ne’ebe la’o iha tinan 2021 mai to’o 2023, ne’e tenke aselera ho lalais. Selae maka kompania hetan tiha finanseiru, maibe nia laiha kbiit atu ezekuta projetu refere iha nia suku, maske governu tau tiha ona iha osamentu, maibe ezekuasaun fraku tebes.
“Ami simu ona orieintasaun husi Primeiru Ministru, atu orienta ba baze hodi aselera lalais prosesu ezekusaun no finalize lalais obras sira ne’ebé la’o hahu iha tinan 2021 mai too 2023, obra sira ne’ebe lao seidauk atinje to’o 40% tenke fo ninia razaun, Nune’e ita bele buka solusaun lalais, tanba tinan oin ita tenke hahu ho buat foun,” Nia informa.
Iha fatin hanesan, Diretur Planeamentu e Dezenvolvimentu Integradu Munisipal (PDIM), Cesar Jose Martins da Silva hateten, enkontru ida ne’e importante tebes, tanba bele halo avaliazaun ba projetu fisiku sira ne’ebe maka lao iha tinan 2021 too 2023 iha Munisipiu hotu hotu inklui RAEOA.
“Tinan 2023 nian besik remata ona, tanba ne8e maka Ministru Orienta SEDL, hodi konvoka reuniaun ida ne’e, nune’e ita hotu bele fo informasaun ne’ebe maka klaru no los konaba implementasaun projetu PDIM ne’ebe la’o iha Munisipiu sira ne’e, tanba tuir informasaun katak, projetu 2021 mai too 2023, balun la’o susesu no balun seidauk, tan nee, tenke fo mos nia razaunn,”dehan Diretur.
Total projetu sira ne’ebe maka la’o iha tinan 2021 hamutuk 53 projetu husi total ne’e iha projetu 6 maka kanseladu no projetu 5 sei la’o hela no 43 maka finaliza ona, ne’e iha Munisipiu hotu.
Projetu ne’ebe la’o iha tinan 2022 hamutuk 15 maibe husi total ne’e rua deit maka finaliza ona ho diak, seluk ne’e sei la’o hela. Iha tinan 2023 nian total projetu hamutuk 31, prosesu konstrusaun sei la’o hela, seidauk finaliza.
Projetu PDIM husi tinan 2021-2023 hamutuk atus Ida (100) entre sira haatnulu resin sia (49) iha territóriu nasionál seidauk finaliza, Projetu neen mak konsidera kanseladu no Projetu 45 mak finaliza ona.
Enkuantu, partisipa iha Avaliasaun Progresu Implementasaun Projetu PDIM 2021-2023 ne’e hetan Marka Prezensa husi Diretor Nasional, Xefe Departamentu sira Inklui Diretor PDIM Munisipiu 13.
Jornalista : Marcela Mesquita Lemos