Realiza Serimónia Despedida, Francisco & Merício Husu Guvernu Foun Desenvolve Setor Komunikasaun
SAPNewsTL, Dili: Ministru Asuntu Parlamentares no Komunikasaun Sosial (MAPKOMS) Francisco Jeronimo ho Sekretariu Estadu Komunikasaun Sosial (SEKOMS) Mericio Juvinal Akara realiza serimónia despedida, Parte rua ne’e husu ba governu foun kontinua dezenvolve setor komunikasaun iha Timor-Leste (TL) tanba média fator importante ida ba dezenvolvimentu nasional.
“Ami husu ba funsiunariu sira agora ami husik hela servisu hamutuk ho governu foun sei mai troka ami kontinua dezenvolve setor komunikasaun iha Timor-Leste, lalika ko’alia barak maibe hakraik an hatudu ita nia honestidade servisu no komportamentu diak atu servi povu ida ne’e tamba povu presija ita atu servisu ba sira”, dehan MAPKOMS Francisco Jeronimo ba jornalista iha salaun CNE Caicoli, Dili (29/06/2023).
Ministru hatutan, naturalmente moris ne’e tempu halo hasoru malu no fahe malu, iha tinan kotuk hasoru malu, dala uluk ho funsionariu hotu iha Ministeriu Assuntu Parlamentu Komunisaun Sosial, mak foin hahu hari, hotu-hotu prontu servisu tanba nia mai atu servisu hamutuk funsionariu sira hodi lori ministeriu ne’e ba oin no servi povu ida ne’e liu Husi programa ministeriu nian no programa governu nian.
Iha sorin seluk, SEKOMS Mericio Juvinal Akara dehan, sira hakarak fo obrigadu ba ema hotu iha MAPKOMS no SECOMS tanba hamutuk ho sira halo programa governu VIII nian durante tinan lima nia laran.
“Hahu husi ami mai, ita hasoru malu, koñese malu durante tinan Lima nia laran, hakarak fo apresiasaun uluk ba ita nia primeiru ministru, mak konvida Ha’u atu mai iha governasaun ida ne’e atu ajuda nia atu servi ita nia rai, ha’u hakarak hato’o obrigadu ba ema hotu durante ita hala’o servisu hamutuk”
“Ami nia servisu tuir politika oitavu governu konstituisional espesialmente iha area komunikasaun, aprovadu iha parlamentu nasional, ami orienta politika ida ne’e interpreta ba planu asaun annual, ba funsionariu sira husi diretor jerál, xefe gabinete, to’o ba servisu cleaner sira hotu-hotu maka sai forsa traballu misaun tinan lima nian, ne’e duni obrigadu no parabens ba ita boot sira nia servisu diak”, tenik Mericio
Mericio informa tan,sira mos husu deskulpa karik balun la toman ho sistema ida hanesan ne’e, ba hotu-hotu ne’ebe ladun kontenti ho orientasaun diresaun ne’ebe mak sira fo, bele halo reflesaun hodi tuir ida-idak mak diak ba nasaun no sira atu husik ona tan ne’e sira husu funsionariu MAPKOMS nian servisu hamutuk ho governu foun, kontinua dezenvolve setor komunikasaun iha Timor-Leste, SEKOMS ne’e mos husu ba governu foun atu tau atensaun ba media sira, media estatal no privadu sira.