Imajen Reitor UNPAZ Adolmando Amaral iha Kampus Sentral UNTL, 15/11/2022
SAPNewsTL, Dili : Hafoin Magnifiku Reitor Universidade da Paz (UNPAZ) Adolmando Amaral ho estudante UNPAZ marka presensa iha Resintu Kampus Sentral UNTL hodi manifesta sira nia pozisaun kona-ba Politika Parlamentu Nasional Sosa kareta foun, lei pensaun vitalisia inklui montante OJE ne’ebe boot hodi kritika Parlamentu Nasional iha tersa-feira orseik.
Liu husi Komunikadu Imprensa, Magnifiku Reitor UNTL, João Soares Martins haktuir, nia parte laiha kunhesimentu kona ba prezensa Reitor UNPAZ ho estudante sira iha resintu Kampus Sentral UNTL
“Ami Lamenta teb-tebes ho atetude Magnifiku Reitor Universidade da Paz (UNPAZ) Adolmando Amaral ho estudante sira ne’ebe mak mai utiliza kampus UNTL halo manifestasaun, tanba nia la fo kunhesimentu atu mai iha halo Manisfestasaun iha resintu UNTL, ami respeitu liberdade expresaun, maibe ami la kontente tanba sira uza ami nia fatin”. Tenik Reitor UNTL iha Auditorium FECT-UNTL Hera, 15/11/2022
Entretantu, ukun nain UNTL ne’e afirma, nia parte husu ema hotu atu respeitu liberdade imprensa, maibe husu atu labele utiliza Kampus UNTL tanba perturba prosesu ensinu aprendijajem
Imajen Komunikadu Impirensa husi Estrutura UNTL ne’ebe lidera direita husi Reitor UNTL, iha Auditorium FECT-UNTL
Reitor ne’e mos lamenta ho estragus sira, tanba asaun ne’ebe harahun vidru odamatan universidade nian, ne’e konsidera krime
“Asaun ne’ebe harahun vidru odamatan universidade nian, Asaun Krime ne’e, ami sei prosesa tuir prosesu ne’e mak iha”.
Reitor UNTL ne’e mos lamenta ho asaun Aliansa Maubere Nasional ne’ebe halo manisfestasaun hodi perturba prosesu ensinu estudante sira nian iha UNTL
“Ami lamenta teb-tebes tanba Aliansa Maubere Nasional nia manifestasaun ida ne’e tanba perturba tebes prosesu ensinu aprendijajem iha Universidade Nasional Timor Lorosa’e liliu iha Fakuldade Direitu no Fakuldade Agrikultura, iha ne’ebe halo estudante sira la bele tuir aula no ezame ho diak tanba sira hakilar no halo barullu, ami mos laiha lisensa ba AMN nein atu halo manisfestasaun iha resintu UNTL, ami konkorda sira halo manifestasaun, maibe ami la konkorda ho fatin”. nia sublinha
Asaun Pasifiku husi Estudante UNPAZ iha resintu UNTL. Foto : Marcela da Costa
Entretantu, Reitor João Soares Martins husu PNTL atu halo atuasaun no evita demostrasaun refere
Enkuantu, Reitor UNTL ne’e husu Aliansa Maubere Nasional (AMN) atu tau iha konsidera hodi labele uza resintu UNTL ba halo manifestasaun, Nia Parte husu mos estudante UNTL tomak atu kontinua kalma hala’o prosesu ensinu
Portantu, antes ne’e Parlamentu Nasional liu husi debate espesialidade hapara ona politika sosa kareta foun no laptop ba deputadu sira
Jornalista : Marcela mery da Costa
Editor : Ekipa Editorial