Relembra Bedinho Nia Mate Iha 1999, Joven Agora Tenki Sai Arte Ba Damen
SAPNewsTL, Dili : Repúblika Demokrátika Timor-Leste (RDTL) nia ukun rasik an ne’ebe sosa ho ema liu rihun atus tolu resin, la ses mos husi Juventude Resistênsia sira nia luta ne’ebe se hirus matan ba invazor Indonésia ninia kilat musan husi Tropas sira to’o barak mak lakon vida tanba kauza husi Independênsia
Ohin Loron 26 Fulan Agustu 2023, Timor Leste hanesan Nasaun Independente ne’ebe hamrik mesak ona desde 2002 to’o ohin loron, maske ukun an tinan ruanulu resin ida (21) ona maibe Sosiedade Timor-Leste sei nafatin hasoru violasaun direitus humanus liliu mosu konfrontu, krime no violênsia oioin liu husi baku malu, odiu malu, Asalta malu, Ameasa malu to’o oho malu
Violênsia ne’ebe mosu iha komunidade nia leet la sees husi Juventude prátika Artes Marsiais no Ritual ne’ebe registradu iha notariadu Timor Leste nian
Ohin loron 26 Agustu 2023, hanoin hikas Saúdozu Bernadinho Guterres “Bedinho” ne’ebe hetan tiru husi Tropas Indonésia sira iha area Kulu-hun, 26 Agostu 1999
Tuir Sidadaun Natanael Lobato liu husi nia ID Privadu Facebook haktuir “Iha Tinan 24 ba kotuk hanoin hikas Ha’u belun diak, Primo, maun alin i kolegas BEDINHO ne’ebe hetan tiru hosi tropas Indonesia iha tempu okupasaun no referendum”.
“Saudoso Bedinho Nia Ran Fakar ba Ukun Rasik, Sempre iha ami nia fuan-laran, Dalan uniku atu dignifika imi nia mate mak liu husi Liberta Povu husi Kiak no Mukit, hari’i paz no estabilidade ba povu no nasaun Timor Leste”. Sita Natanael Lobato liu husi ID Privadu Facebook, 26/08/2019. SAPNwesTL Screenshot
Maske Nune’e, Daudaun ne’e Komunidade tomak preokupa ho Konflitu individu no organizadu sira ne’ebé mosu iha fatin fatin hodi halo sosiedade la seguru no hakmatek tanba individu sira ne’ebe prátika arte Marsial seidauk konsege komunga didiak doutrina sira ne’ebe kada arte Marsial sira hanorin
Iha sorin seluk, Bispu Dom Leandro Maria Alves Atuàl Bispu Dioseze Baukau ne’e konsidera Jovens Prátika Arte Marsiais no Ritual ne’e Diak tanba sira aprende arte sira hodi dezenvole an maibe joven sira tenki buras an ho paz, estabilidade no unidade
“Jovens Prátika Arte Marsiais no Ritual ne’e Diak, diak liu tan wainhira sira buras an ho domin, damen no hakmatek iha sosiedade no komunidade em Jerál”. Tenik Bispu Dioseze Baukau Dom Leandro Maria Alves ba SAPNewsTL iha Luro, 22/08/2023
Antes ne’e, Presidente Parlamentu Nasionàl Maria Fernanda Lay hatete, “Atu investidor Internasional sira investe iha rai laran, uluk nanain Timor Leste tenki iha paz no estabilidade, se laiha paz so ema bulak mak bele mai investe iha nia rain”. Presidente PN Maria Fernanda Lay saran lia hirak ne’e hafoin hala’o sorumutu ho Presidente Repúblika José Ramos Horta iha Palasiu Presidensial Aitarak-laran Dili.
Enkuantu, Komisaun Regulador Artes Marsiais (KRAM) liu husi nia Presidente KRAM Octávio da Conceição sempre apela ba Lider Grupu Arte Marsiais no Ritual sira hodi kontrola membru sira no labele kria konflitu iha sosiedade maibe arte Marsial sira tenki sai autor ba paz no estabilidade iha Timor Leste
Iha Parte Seluk, Komandante Polísia Nasional Timor Leste (PNTL), Munisipiu Dili mos husu ba Membru Arte Marsiais no Ritual sira hodi kontribui ba damen no unidade iha sosiedade tanba konsidera paz no estabilidade mak save ba dezenvolvimentu nasional
Jornalista: Marcela Mery da Costa