Nilton Gusmão Prontu Sai Prezidente FFTL Foun
SAPNewsTL, Dili: Nilton Gusmão prontu sai Prezidente Federasaun Futebol Timor-Leste (FFTL) depende asosisaun futebol sira iha Timor-Leste fo fiar iha kongresu extraordinariu, tuir estatutu FFTL tenki hala’o iha fulan tolu nia laran komesa husi loron 1 fulan jullu 2023 asosiasaun futebol 16 kansela ajenda hakarak ba kongresu extraordinariu.
“Karik asosiasaun futebol maioria apoiu, Ha’u prontu tuir asosiasaun sira nia hakarak hodi kandidatu ba Prezidente FFTL iha kongresu extraordinriu iha fulan setembru 2023 tanba ita iha hanoin organiza, kontribui, hadia no dezenvolve futebol iha Timor-Leste,”
“Maibe buat hotu depende asosiasaun sira tanba sira mak iha direitu, portantu komunikasaun iha maibe desizaun ikus seidauk iha tanba iha hela faze konversa”, dehan nain ba kompania ETO Nilton Gusmão ba jornalista sira iha salaun City 8 Manleuana, Dili Domingu (27/08/2023).
Nilton hatutan, asosiasaun futebol balun komunika ona nia, depois sira husu para nia kandidatu an ba prezidente FFTL iha kongresu extraordinariu maibe sei iha faze Komunikasaun
Nia rasik seidauk deside atu kandidatu ka lae tanba buat hotu depende ba asosisaun sira, sira mak iha direitu hili, karik maioria asosiasaun apoiu ema seluk nia poiu nafatin.
Nia afirma tan, nia prontu iha saida deit ne’ebe mak ema presiza, nia prontu fo enerjia tomak hodi hadia buat balun maibe depende ba asosisaun futebol sira tanba se nia prontu mak la iha apoiu la folin, nia hakarak organiza, kontribui, hadia no dezenvolve futebol iha Timor-Leste
Iha sorin seluk, Presidente Assosiasaun Futebol Munisípiu Bobonaro Domingos Goveia hatete, sira prepara ona pakote ida mak Nilton Gusmão tanba asosiasaun 14 mak hakarak ona apoiu Nilton Gusmão avansa ho Jeneral Falur Rate Laek ho razaun fundamental atu halo mudansa ba futebol iha Timor-Leste.
“Ha’u hanoin Públiku tomak hatene ita nia FFTL iha problema maibe Timoroan hotu sei hare’e iha kongresu extraordinriu tan ne’e ami prepara ona pakote ida mak apoiu no favoritu husi asosiasaun futebol sira mak Nilton Gusmão avansa ho Jeneral Falur Rate Laek”,
“Assosiasaun Futebol 14 mak fo apoiu ba Nilton Gusmão atu lidera FFTL ho razaun fundamental atu halo mudansa ba futebol iha Timor-Leste tanba Nilton Gusmão nu’udar jerasaun foun no hanoin diak dezenvolve futebol iha Timor-Leste tan ne’e asosiasaun futebol 14 fo fiar no kunese klean Nilton Gusmão”, tenik Domingos
Domingos informa tan, asosiasaun futebol 14 hakarak apoiu Nilton Gusmão ba prezidente foun FFTL mak asosiasaun futebol munisipiu Bobonaro, Likisa, Oe- Cusse, Lautem, Baucau, Viqueque, Manatuto, Manufahe kampiaun divizaun dahuluk Liga Timorense 2023, asosiasaun treinador, arbitrajen, sentru treinamentu futebol juvenil, no femenina
Sira nia parte fiar katak kongresu extraordinariu mai ne’e asosiasaun sei aumenta bele mos apoia absoluta ba Nilton Gusmão.
Entretantu Asosiasaun futebol sira agora buka kandidatu ba Prezidente FFTL foun tanba iha loron 1 fulan jullu 2023 kongresu ordinariu FFTL asosiasaun futebol 16 kansela ajenda hakarak ba kongresu extraordinariu tanba lakon ona konfiansa ba estrutura atual federasaun lidera husi Francisco Jeronimo ho Gregorio Correia
Reportajen: Augusto dos Santos