Remata Kongresu Extraordinariu ! Eleisaun Prezidente FFTL Foun Iha 2024
SAPNewsTL, Dili: Federasaun Futebol Timor-Leste (FFTL) sei realiza eleisaun hili prezidente foun iha janeiru 2024 hafoin realiza kongresu extraordinariu iha loron 10 fulan novembru 2023 iha otel Timor.
“Tuir ita nia ajenda iha ona depois kongresu extraordinariu prezidente FFTL rezigna an ona, ita nia ekipa sei prepara kongresu hili prezidente FFTL foun iha loron 10 fulan janeiru 2024”.
“Tan ne’e husu ba asosiasaun sira halo tuir parte komisaun organizador aprezenta karik iha asosiasaun sira iha buat ruma atu hatama iha ajenda kongresu tuir mai informa kedas para kongresu tuir mai ita lao tuir padraun iha ona ne’e”, dehan reprezentante prezidente FFTL interinu Henrique da Costa ba jornalista sira liu husi diskursu iha Otel Timor Colmera, Dili sesta (10/11/2023).
Reprezentante ne’e hatutan, haktuir husi estatutu FFTL nian bainhira prezidente rezigna an ka la iha fatin vise-prezidente mak asume fali knaar prezidente nu’udar prezidente interinu provizoriu hodi lidera FFTL no kongresu tuir mai hodi hili prezidente foun.
Desenvolvimentu futebol iha Timor-Leste atu lao ba oin laos depende deit ba prezidente FFTL maibe depende ba ema hotu nia vontade uza kapasidade tuir kompetensia.
Nia informa tan, durante ne’e modalidade futebol iha Timor-Leste iha progresu lubuk ida ona hamorin Timor-Leste nia naran maibe sei iha dezafiu barak presiza ema hotu nia kontribuisaun atu nune’e bele sai husi dezafiu ne’e maski la fasil nune’e iha futuru se deit mak mai prezidente FFTL tenki iha kunesimentu ba futebol ho fuan boot tanba orsamentu FFTL depende ba FIFA, AFC ho AFF.
Tan ne’e asosisaun sira tenki ezizi para fundu ne’e utiliza tuir nia dalan katak buat ladiak asosiasaun sira dehan la diak, diak tenki dehan diak atu nune’e buka solusaun hamutuk hadia ladiak ne’e.
Entretantu, rezultadu husi kongresu extraordinariu ne’e prezidente FFTL Francisco Jeronimo ho membru ezekutivu Augusto Henrique rezigna an husi kargo, relatoriu orsamentu FFTL tinan 2022 pasa ho votasaun afavor 13, kontra 5 no abstensaun 3 husi asosiasaun futebol 21.
Portantu orsamentu FFTL tinan 2022 parte diresaun FFTL aprezenta ba asosiasaun futebol 21 iha kongresu extraordinariu apoiu husi FIFA ho montante 1, 601, 325, 000 USD fahe ba kustu operasaun, fundu COVID-19 no travel funds, apoiu husi AFC montante 405, 488 USD fahe ba enhance advantage no enhance extra time no apoiu husi AFF 682, 702,45 fahe ba AFF airfare funds, akademia futebol juvenil, treinador KOICA Gov Funds.
Reportajen: Augusto dos Santos