Rogerio : Tempu Ba Hadia Erru & Lori Moris Di’ak Ba Povu
SAPNewsTL,Dili : Iha ámbitu komemorasaun independensia ba dala 48⁰ ne’e, Lider Resisténsia Rogeiro Tiago Lobato hateten infraestrutura seidauk sufisiente ba povu, maske nune’e maibe nia mos sente kontente tanba liu ona terus barak mesmu ema barak mak mate iha tinan 1975 maibe apresia tanba bele ukun rasik an.
iha 1975 Timor oan sira sempre dehan mate ka moris ukun rasik an, tan ne’e sente kontenti mesmu liu husi terus oi-oin no triste mos tanba lakon maluk barak ba rai ida ne’e maibe ohin loron konsege ukun an.
“Desenvolvimentu ne’e seidauk la’o ho diak, tanba erros barak mak seidauk hadia, tan ne’e husu ba governu ne’ebe agora ukun atu hadia erros sira ne’ebe iha tinan lima liu ba, para independensia ne’e lori duni moris diak ba povu.”
“Povu nia esperansa hakarak indepedensia tanba hakarak moris diak, maibe ita tinan rua nulu(20) ona restaura indepedensia maibe povu barak seidauk moris diak,joven barak sei ba rai-liur buka moris no ema barak faan sasan dala ruma hetan deit dolar ida ka dolar rua kada loron”. Dehan Lider historiku Rogerio Lobato ba jornalista sira hafoin remata isar Bandeira Nasional iha Palasiu Predidenste Aitarak laran,Tersa(28/11/2023)
Rogerio Lobato hatutan, hamutuk luta ba libertasaun no kontra okupasaun manan tiha indepedensia maibe la hamutuk haree problema barak iha rai laran, to’o agora sei iha konflitu oho malu, ema hotu tenke kria estabilidade atu rai ne’e bele hakmatek.
Iha fatin hanesan, Joventude Virgilio da Costa Sampaio, sente gratitude no fo agradese ba ukun nain no luta nain sira ne’ebe halo esforsu durante tinan naruk nia laran to’o Timor Leste hetan ukun rasik an.
“Ohin especial ba loron proklamasaun povu doben rai Timor-Leste tomak, nu’udar joven orgullu tebes tanba ho sira nia luta, ohin loron ita liberta Patria no liberta nasaun,ami joventude nia hakarak ne’e prossesu dezenvolvimentu mesmu neineik maibe ukun nain sira tenke kolabora hamutuk hodi lori ita nia nasaun ne’e ba oin”.Nia hateten
Foinsa’e Timor oan ne’e mos preokupa situasaun ne’ebe ladun diak iha sosiedade no komunidade liu-liu nasaun ida ne’e, barak mak sei halerik hela ate agora no mos sei moris iha Mukit no kiak nia laran
“Infraestrutura bee mos,estrada no eletrisidade ne’ebe iha area rurais sira seidauk hetan, na’in ulun sira kolabora hamutuk atu nunee lori ita nia nasaun ne’e ba oin no lori povu ne’e ba moris diak.” sublina Virgilio.
Entretantu, Foinsa’e ne’e dehan atu lori nasaun ne’e ba oin presiza investe maka’as iha area importante sira hanesan saude, bee moos, edukasaun no hamenus desempregu iha rai laran.
Jornalista : Ermelinda Soares & Benezia dos Reis