Saláriu Funsionáriu FFTL Boot Liu Jogador, Aleixu Kestiona FFTL Seidauk Kria Kondisaun
SAPNewsTL, Dili : Prezidente Klube Emmanuel FC Aleixo da Costa kestiona Federasaun Futebol Timor-Leste (FFTL) foti jogador husi klube no asosiasaun sira ba selesaun nasional maibe federesaun la ajuda sira liu husi investe fundu ba klube no asosiasaun sira halo preparasaun ba jogador sira husi juvenil to’o sénior.
“Ami klube hamutuk asosiasaun no sentru juvenil sira mak prepara jogador husi juvenil to’o sénior hafoin federasaun tolan tomak ba selesaun nasionál maibe FFTL la kria kondisaun diak ba klube, asosiasaun no sentru sira liu husi fundu husi FIFA, AFC no AFF ne’ebe kada tinan sempre manda orsamentu mai federesaun ho ida ne’e hau hanesan prezidente klube kestiona tebes ba ida ne’e, ha’u sujere ba federasaun tenki tau atensaun ba ida ne’e atu nune’e ita labele derrota hela deit iha jogu internasional sira”. Tenik Prezidente Emmanuel FC Aleixo Carvalho Monteiro ba jornalista sira iha nia knaar fatin Hudi-Laran, Dili kuarta (03/08).
Prezidente ne’e aumenta, FFTL foti jogador ba selesaun nasional husi klube ne’e hatudu katak klube sira iha kontribuisaun ba futebol iha Timor-Leste tanba transforma ona jogador sira iha klube asosiasaun no sentru sira
“Federasaun tenki servisu diak no tranparánsia ba públiku atu nune’e ema hotu hatene dezenvolvimentu futebol iha Timor-Leste lao to’o iha ne’ebe, labele lori jogador husi klube, asosiasaun no sentru sira mai federasaun hodi halo privilejiu ba federasaun rasik ne’ebe halo salariu funsionáriu FFTL boot liu jogador selesaun nasional sira, jogador treinu mate an iha kampu no joga to’o iis atu kotu sira hetan salariu ladun ekivalénsia ho funsionáriu federasaun sira ne’ebe tuur deit iha edifisiu, ne’e la iha lojika ne’ebe ida ne’e mak federasaun dehan dezenvolve futebol iha Timor-Leste”. Nia hatete
Prezidente Klube ne’e, sujere federasaun tenki simu ema hotu nia ideia hodi dezenvolve futebol iha Timor-Leste tanba futebol ne’e indústria boot ida iha mundu tanba iha Timor Leste ema barak paixaun ba futebol maibe autor ba futebol no husu ba federasaun tenki tau atensaun masimu ba liga domestika Timor-Leste
“Jogador sira labele derrota nafatin hanesan daudaun ne’e maibe kongratula jogador selesaun nasionál sira maski hasoru difikuldade maibe sempre firme nafatin reprezenta Timor-Leste ba kompetisaun internasional”. Dehan nia
Nia hatete, federasaun tenki tau valor ba futebol iha Timor-Leste atu nune’e hetan fini diak tan, nia fundamenta SEJD no FFTL tenki halo jogu husi baze hodi lori jogador sira mai klube depois transforma ba selesaun nasional maibe ida ne’e orgaun rua ne’e tenki tau osan ba ida ne’e no fo mos ba klube, asosiasaun no sentru sira
“Federasaun labele fahe fali Sexta Bázika iha FFTL tanba FIFA, AFC, no AFF lori osan mai klube, asosiasaun no sentru sira hodi prepara jogador diak ba selesaun diak liu tan, federasaun tau interese masimu iha futebol hodi tau as interese klube sira”. Nia hakotu
Reporter : Augusto dos Santos