Santu Padre Husu Kardeal Foun Servisu Maka’as, Kardeal Virgílio: Sarani Diak, Hala’o Knaar Didiak
Vatikanu, SAPNewsTL : Hafoin Santu Padre Fransisco halo investidura ofisilamente ba Bispu na-in-21, inklui Arsebispu Arkedioseze Metropolitana Dili, Dom Virgílio do Carmo da Silva, Papa Fransisco husu ba kardeál sira atu servisu makaas hodi ajuda papa no sai roman ba sarani tomak Maromak nian.
“Ita reza atu kardeál foun sira tulun ha’u iha ha’u- nia misaun nu’udar Bispu Roma nian ba povu tomak Maromak nian,” dehan Papa liu hosi mensajen.
Papa haraik ba sira ida- idak titulu kardeál no hahú iha momentu ne’e mak kardeál sira sei bolu ho títulu apelativu Sua Eminência Reverendíssima.
Hafoin simu investidura, Sua Eminência Reverendíssima Virgílio do Carmo da Silva hateten kargu foun sai kardeál nu’udar ksolok foun ba istória Igreja Katólika Timor-Leste no sarani tomak, hafoin Timor-Leste selebra tinan 500 ezisténsia doutrina Katolika nian iha Timor-Leste.
“Ohin momentu ksolok ida ne’e la’ós ba ha’u de’it, maibé ksolok ba Igreja no povu Timor-Leste, mai ita agradese ba Maromak ba ksolok boot ne’ebé Na’i Maromak haraik ba uma Kreda no ba povu Timor, ne’e duni mai ita haksolok nafatin ba Na’i Maromak ninia bolu no hodi hala’o ita hotu nia knaar nu’udar sarani ida di’ak,” dehan Kardeál Dom Virgílio
Iha Fatin hanesan, Enviadu Espesiál Extraordináriu Prezidente Repúlika, Kay Rala Xanana Gusmão hato’o parabéns husu povu tomak atu agradese Nai Maromak no Papa Francisco ne’ebé nunka haluha hodi hili Timoroan ida sai kardeál foun ba rai doben Timor-Leste.
“Ita hotu kontente atu bele partisipa iha serimónia ida simples tebes, ohin ita rona Amu Papa dehan ba kardeál foun sira hodi hatudu ba mundu katak, ita hotu nia fe (fiar) sei iha, no ita hotu hanoin mensajen Papa katak, fraternidade umana ne’e tenki iha kardeál sira idak-idak hodi motiva joven sira atu hari’i kultura dialogu, kooperasaun no kultura armonia hodi joven sira bele halibur malu halo buat di’ak ba nia rain no ba ema seluk hodi kria paz no estabilidade,” dehan Xanana.
Iha parte seluk, Reprezentante Madre Kongregasaun SSpS, Joana Soares no Madre Kongregasaun Franciscana iha Italia, Ana Paula Soares Correia ne’ebé reprezenta komunidade Timoroan sira ne’ebé partisipa serimónia konsistóriu ordinariu públiku ne’e sente orgullu, tanba Timor-Leste nasaun kiik, iha ona kardeál rasik.
“Parabéns, ita hotu agradese tebes, depois tinan 500 liu ita hotu hetan kardeál ida, mezmu ita foin mak ukun aan tinan 20 liu, maibé ho Grasa Maromak nian ita simu ita nia kardeál foun Don Virgillio,” Madre Joana agradese.
Entretantu, hafoin simu investidura, kardeál foun sira hosi nasaun 20 inklui Timor-Leste hetan oportunidade hodi kumprimenta sarani kada nasaun ne’ebé partisipa iha serimónia ne’e.
Enkuantu, Hosi Timor-Leste nian, sarani atus resin hamrik formatura lori baindeira RDTL hodi hananu Inu Nasionál “Patria-Patria” no hakilar slogan rezistensia “Viva-Viva Timor-Leste” hamutuk ho Lider Istóriku, Kay Rala Xanana Gusmão hodi formatura ba kumprimenta Kadeál Dom Virgilio.
Entretantu, Kardeál na’in-21 ne’ebé hetan investidura kompostu husi kardeál foun na’in-ualu (8) hosi Europa, neen (6) hosi Ázia, rua (2) hosi Áfrika, ida (1) hosi Amérika Norte, haat (4) hosi Amérika Sentrál no Latina Amérika nian.
Enkuantu, Kardeál sira ne’e, simu investidura hosi Papa Fransisco hodi fó kadeli kardinalísiu no halo sira nia juramentu no koloka barrete (chapeu com 3 ou 4 pontas) iha sira nia ulun, no chapéu (barrete) ne’e hola parte iha vestimenta litúrgika nu’udar sinal de dignidade ho nia signifikadu hala’o misaun Jesus Kristu nian ho korajen no barani fakar nia raan hodi tane nafatin fe kristaun no doutrina sira hodi “sai roman ba sarani tomak Maromak nian”.
Serimónia investidura ne’ebé hala’o iha Uma Boot Igreja Basilika São Pedro Vaticano Roma, ne’e partisipa direita hosi lider mundiál balun no Timor-Leste nian Reprezenta hosi Enviadu Espesiál Extraordináriu Prezidente Repúlika, Kay Rala Xanana Gusmão, padre, madre no sarani rihun hosi nasaun oin-oin.
Jornalista : Vinsensius Saldanha Morais De Araujo