SAPNewsTL Fo Agradese Ba Família Maktoban Aquelina Mangalhães
SAPNewsTL, Ermera : Diretor Mídia Juvenil, SAPNewsTL Sergio Alves da Costa fo agradese ba família maktoban, Jornalista Aquelina Mangalhães liliu ninia papa no mama inklui ninia parseiru tanba oferese nia oan feto matenek no aten brani ida hamutuk ho nia maluk sira hari’i no funda mídia SAPNewsTL ho susesu.
Diretor Midia SAPNewsTL Sergio Alves da Costa saran lia hirak ne’e, wainhira partisipa iha serimonia fúnebre ba Maktoban Aquelina Mangalhães iha rai moris fatin Postu Administrativu Letefoho Munisipiu Ermera, 27/12/2023.
“Lori familia boot SAPNewsTL inklui Konselleiru Padre Mouzinho Pereira Lopes, Presidente Konsellu Islamiku Timor-Leste (KONISTIL) Pascoal Sidik Lemorai no Eng. Armindo de Jesus, ami hamutuk ho fuan no neon hato’o sentidu kondolénsia profunda ba familia no agradese wa’in tebes ba familia Aquelina Mangalhães espesial ba ninia Pama no Mama inklui ninia parseiru ne’ebe lakon ona oan feto matenek no aten brani ida ne’ebe ohin fila ona ba Aman Maromak nia kadunan santu”.
“Ohin ita hotu hamutuk iha ne’e, iha fatin ida ne’e ita trizte tebes tanba ita sente lakon Aquelina Mangalhães, ita nia planu oin seluk, Maromak nia planu diferensa ho ita, Nia bolu ona Aquelina fila, maibe Aquelina hari’i ona mídia ida hamutuk ho nia maluk sira iha ne’e, entaun Aquelina la mate, nia muda deit ba espasu seluk, no Aquelina husik hela rekadu ka obra ida SAPNews iha ne’e, obra ne’e konta ho terus, susar, kosar no matan been Aquelina nian”. Tenik Diretor Mídia SAPNewsTL Sergio Alves da Costa ba familia sira iha Letefoho, 27/12/2023.
Diretor Mídia Juvenil SAPNewsTL Sergio Alves konsidera Aquelina Mangalhães hanesan protagonista ida ba SAPNewsTL, Nia hanesan jornalista feto ida ne’ebe brani, badinas, haraik an no simplesidade tebes, nia hatudu ida ne’e liu husi nia dedikasaun no sakrifisiu sira iha mundu jornalismu.
“Maktoban Aquelina Mangalhães hanesan protagonista ida ba Midia SAP News TL, Aquelina Mangalhães ninia kontribuisaun boot teb-tebes ba Mídia Akadémika, Media Juvenil no media estudantil ida ne’e, ninia dedikasaun no kontribuisaun hotu sura la nahas, no nunka atu haluha, Mídia ida hari’i laiha osan no hasoru situasaun difisil tebes, maibe Aquelina hamrik firme no servisu to’o minutu ikus maromak mak bolu nia.”Sergio Alves da Costa hateten
Maktoban Aquelina Mangalhaes moris iha loron, 30 Fulan Setembru 1999, husi Aman Adelino Maia no inan Manuela Conceição Mangalhaes, Matebean nu’udar oan dahaat husi maun no bin alin nain 7 husi uma lisan Naomou Mougenu, Postu Letefoho Munisipiu Ermera.
Hafoin ramata estudu iha ensinu sekundaria, Maktoban Aquelina Mangalhães kontinua tuir kursu Jornalizmu iha Grace For Development (GFD) iha tinan 2021, tuir mai Maktoban hamutuk ho nia maluk sira estudante universitariu, kursu profisional jornalismu no finalista sekundaria sira hari’i no funda Media Juvenil Sa’ani assamana prazer news timor-leste (SAPNEWSTL) iha loron 26 Fulan Fevereiru tinan 2022.
Hafoin hari’i Midia Sapnewstl iha tinan 2022, Aquelina Mangalhães simu responsabilidade husi membru sira hodi sai xefe departamentu informasaun to’o ohin loron, nia hakotu iiis iha nia rain moris fatin Postu Administrativu Letefoho Munisipiu Ermera iha loron 25 Fulan Dezembru 2023 tanba sofre moras.
Molok halot ba nia deskansa fatin ikus nian, Aquelina Mangalhães hetan presta omenagem husi Konsellu Imprensa de timor leste, Timor Leste Press union, Assosiasaun jornalista timor leste, alumni sira grace for development no nia famlia boot midia sapnewstl.
Matebean Aquelinha Mangalhaes hakotu iis ho idade 24, mate iha loron 25 Dezembru no Familia sira halot iha loron 27 fulan dezembru 2023.
“Matebean Aquelina Mangalhães ba hamutuk ho maromak, hela ho maromak no la’o maromak iha nia roman nabilan rohan laek nian, boa viagem, adeus adeus no adeus, Obrigadu barak ba dedikasaun tomak.”
Jornalsita : Conzita Mota