Saran Frater Na’in 4 ! Dom Leandro Agradese Ba Inan Aman

SAPNewsTL, Viqueque: Iha Munisipiu Viqueque, Parokia Nossa Senhora Imaculada Conceiçao realiza serimonia saran Frater nain haat ba uma kreda hodi kontinua ba ordenasaun diakonal.

Bispo Dioseze Baucau Dom Leandro Maria Alves hateten familia sira ho domin saran oan sira ba uma kreda nune’e sira mos ho neon tomak saran ba Maromak nu’udar ida ne’ebe hili husi povu nia le’et no sei fila fali ba iha Povu nia le’et hodi servi

Tuir Bispo Dioseze Baucau Dom Leandro Maria Alves katak familia sira husi Frater nain haat saran nia oan sira ba uma kreda tuir kultura ida-idak nian ne’e haree katak familia entrega nia oan sira ba uma kreda atu servi maromak no servi Povu.

“Ohin ita bo’ot sira ho laran tomak entrega ita bo’ot sira nia oan ba uma kreda, ita bo’ot sira ohin ida-idak mai ho nia kultura hatudu katak ita bo’ot sira husik ona ita bo’ot sira nia oan ba igreja husik sira atu servi Na’i Maromak hodi servi Maromak nia povu”. Dehan Bispo Dioseze Baucau Dom Leandro Maria Alves hafoin remata serimonia saran frater sira ba uma kreda iha Parokia Nossa Senhora Imaculada Conceiçao Viqueque; Kinta-Feira, 7/12/2023

Bispu Dioseze Baucau ne’e hatutan igreja ho neon tomak simu oan sira ne’ebe inan aman saran ba kreda no oan ida be’e sira saran ne’e mak sei fila fali hatudu dalan no domin maromak nian ba sarani hotu iha fatin ne’ebe sira iha.

“Ohin ita bo’ot sira mai entrega, ami igreja ho neon ho laran simu ita bo’ot sira nia oan i oan sira ne’e mak sei fila fali ba iha ita bo’ot sira nia le’et sei sai hanesan dalan hodi hatudu maromak nia domin ba ita bo’ot sira ho sarani sira hotu iha fatin sira hotu ne’ebé sira ba entrega domin”. Tenik Bispo Baucau

Aman ba Dioseze Baucau ne’e haklean oan sira ne’ebe entrega ba uma kreda ne’e maske familia maibe saran ona igreja nune’e sai familia igreja Dioseze Baucau nian.

“Buat ida ne’ebe ita haree ba ke’an teb-tebes, ohin ba oin los duni katak kotu ona, hakotu ona ita bo’ot sira nia relasaun maibe atu dehan de’it katak mesmu ke sira sei iha familia maibe sira agora proteje mai iha familia igreja ninian igreja ida ne’ebe ita bele dehan mai iha familia Dioseze Baucau ninian”. Dom Leandro afirma

Dom Leandro hameno atu familia sira kontinua reza ba nia oan sira ne’ebe saran ona ba igreja atu dalan ne’ebe sira hili no tuir labele sidi.

“Familia sira mesmu ke entrega ona maibe keta haluha reza nafatin ba sira, reza nafatin atu hanesan ohin buat hotu-hotu ne’ebe ita bo’ot sira reza ho kultura sira atu hamos dalan ne’ebe sira hala’o Na’I Maromak nian atu sira la sidi tan”. Dom Leandro tatoli

Bispo Baucau ne’e mos agradese ba inan aman no familia hotu tanba bele husik nia oan ba uma kreda hodi servi kreda.

“Ho laran tomak hakarak agradese ba familia tomak inan aman sira ne’ebe mak ohin ho laran tomak mai entrega ita bo’ot sira nia oan ba iha uma kreda atu servi maromak no servi kreda”. Bispo Leandro agradese

Bibi atan Dioseze Baucau ne’e mos akresenta ohin haree familia sira ho domin saran oan sira nune’e sira mos ho neon tomak saran ba Maromak nu’udar ida ne’ebe hili husi Povu no sei fila ba Povu nia le’et.

“Familia sira ho domin tomak entrega ita nia oan mai iha igreja, ami ho neon tomak ho domin tomak simu ita nia oan sira ne’e atu entrega ba Na’i Maromak no hanesan Na’i Maromak dehan hili husi povu nia le’et i sei haruka fila fali ba ita bo’ot sira nia le’et”. Nia informa

Entretantu, Frater nain haat ne’ebe ohin saran ba uma kreda no prepara ba simu ordenasaun diakonal mak hanesan Frater Alberico da Costa husi Lautem, Frater Domingos Baptista Fonseca husi Soibada, Frater Helder do Carmo Gomes Henrique husi Manatuto no Frater Canisio de Carvalho husi Uatulari

Enkuantu, serimonia saran Frater ba uma kreda ne’e simu husi Bispo Dioseze Baucau akompana husi Amo Vigariu Jeral, Vise Sancheler, Amo Parokia Vikeke no partisipa husi sarani Vikeke hamutuk ho sarani sira husi Lautem no Manatuto ne’ebe akompana Frater sira

Jornalista: Luis Pailofo