SEI & UN Woman Sei Hakbit Feto Iha Ekonomia No Polítika

SAPNwesTL, Dili : Hafoin Sekretariu Estadu Igualdade (SEI) Elvina Sousa Carvalho hala’o sorumutu ho Parseiru Internasionál UN Woman Iha Timor Plaza Dili, SEI Elvina Sousa Carvalho hateten objetivu husi enkontru ne’e hodi haree hamutuk asuntu jéneru oinsa bele atinje sosiedade ne’ebe igual no inkluzaun

“Ohin, primeira vez SEI hala’o enkontru hamutuk ho parseira internasional UN WOMEN hodi bele haree saida mak ita bele halo hamutuk hodi bele atinji igualidade generu, haree mos atividade governu liliu SEI nian oinsa atinji sociedade igual no inkluzivu”. Dehan Sekretariu Estadu Igualidade Elvina Sousa Carvalho ba Jornalista sira iha Suai Room Quinta (10/08/2023)

Sekretaria Estadu ne’e akresenta, atu atinje sosiedade igual no inkluzivu, presiza mos parseira sira, agénsia nasional, internasional, sociedade sivil sira no responsabilidade ema hotu nian, ema hotu tenki promove no suporta programa sira

SEI sei uza nafatin osamentu ne’ebe mak uluk aprezenta husi governo anterior, “Ami halo jestaun interna de’it 10 milhões ne’e ba SEI uza, ha’u fiar katak ami nia ezekusaun ne’e to’o ona 50%, garante katak ezekusaun ne’e sei di’ak no kualidade iha tinan ida ne’e”Nia subliña

Programa Prioridade ne’ebe mak uluk aprezenta agora kontinua halo mak feto iha vida ekonomia, vida politika no mos ba grupu feto sira ne’ebe mak hala’o atividade iha munisipiu sira

Iha fatin hanesan, Xefe Gabinete UN WOMEN Nishtha Satyam hatutan, nia parte senti kontente tanba bele halo enkontru ida hodi haree hamutuk prioridade iha asuntu igualdade jéneru ba futuru

“UN WOMEN kontente tebes atu haree saida mak prioridade governu nian liu-husi SEI, oinsa bele servisu hamutuk haree kona-ba asuntu igualidade generu nian, bolu atensaun ba parseira hotu oinsa servisu hamutuk hodi apoiu prioridade governu nian”. Nia hatete

UN WOMEN sei servisu hamutuk ho SEI hodi apoia prioridade guvernu nian liliu hakbit feto iha ekonomia, polítika no prosesu foti desizaun

Jornalista: Esmeralda da Silva