SEJD & APFTL Halo Abertura Ba Plenária Daruak Parlamentu Foinsa’e

SAPNewsTL, Baucau : Sekretariu Estadu Juventude no Desportu liu husi Diretor Jeral SEJD hamutuk ho Alumni Parlamentu Foinsa’e Timor Leste halo abertura ba sesaun plenaria parlamentu foinsa’e periodu 2019-2022 iha Munispiu Baucau, Objetivu husi plenaria refere atu debate ba issue sira membru parlamentu foinsa’e sira rekolla iha terenu

Tuir Presidente APFTL Zaulino Gomes da Silva haktuir Alumni Parlamentu Foinsa’e Timor Leste  hanesan assosiasaun ne’ebe independente no apartidariu, iha ne’ebe hanesan mos produtu ida husi resultadu Parlamentu Foinsa’e, nune’e Sekretariu Estadu Juventude no Desportu fo konfiansa hodi kontinua implementa, organiza no mobiliza programa Parlamentu Foinsa’e inklui Programa Parlamentu Foinsa’e rasik

Lider APFTL ne’e hateten Parlamentu Foinsa’e nu’udar  kamada no espasu ba foinsa’e sira hodi aprende kona-ba oinsa sai kuadru futuru lider, oinsa sai futuru joven ne’ebe kualidade no halo politika ho profisionalizmu iha kontextu libersaun povu

“Parlamentu Foinsa’e hanesan espasu ba foinsa’e sira hodi aprende no pratika lideransa, pratika diferensa ne’ebe haree malu hanesan Timor oan, oinsa bele projeta nia an no hateke ba dook liu tan hodi hala’o ninia responsabilidade, oinsa sai futuru kuadru lider ne’ebe bele asume iha kargu politika  iha futuru no bele kontribui ba hakmatek, paz no estabilidade iha ita nia rain”. Dehan Presidente APFTL Zaulino Gomes da Silva iha Salaun Santa Ursula Vila Nova, Baucau, 21/12/2022

Nia Hatutan, antes to’o iha plenariu ohin sira hahu ho enkontru bankada no komisaun ne’ebe apresenta ona issue sira husi sira nia postu administrativu ida-idak durante loron rua kona-ba joven ho edukasaun, joven ho moris saudavel, joven ho partisipasaun siviku, joven ho empregu no empregabilidade, joven ho krime no violensia, ohin sira sei diskute no debate issue hirak ne’e iha plenaria

Iha sorin seluk, Diretor Jeral David de Deus hateten Rezolusaun Governu Nú. 23/2009 ho Primeiru Alterasaun Rezolusaun Governu No. 47/2017 ne’ebe hanesan dalan ba estabelesimentu Parlamentu Foinsa’e Nian, iha ne’ebe  nu’udar espasu aprendijajem ba foinsa’e sira ho objetivu atu promove no dezenvolve jovens ninia sensibilidade ba asuntu sosiál, kultural, ekonómika no polítika liu husi formasaun sidadania, prátika demokrasia, identifika problema no solusiona problema sira ne’ebe foinsa’e no komunidade sira enfrenta iha territóriu nasionál

Diretor Jeral SEJD ne’e salienta Parlamentu Foinsa’e sira sei debate kona-ba issue sira ne’ebe hatur iha Politika nasional Juventude hanesan Joven ho Edukasaun, saude, Partisipasaun Sivika, Krime no Violensia, Empregu no Empregalidade

“Ohin, Parlamentu Foinsa’e Nian debate ba tematiku lima bazeia ba politika nasional juventude, tuir faktu no evidiensia sira ne’ebe mak kolleta iha Aldeia, Suku, Postu no Munisipiu, nune’e wainhira dadus ne’e passa bele rekomenda parte relevante sira hodi fo solusaun tuir problema ne’ebe joven sira hasoru”. dehan Diretor Jeral SEJD David Tomas de Deus ba jornalista sira iha Baucau

Entretantu, Partisipa iha Plenaria daruak periodu 2019-2022 ne’e mai husi Munisipiu sanulu resin rua inklui RAEOA hamutuk ualunulu resin sia (89)

Nia akresenta, tinan oin sei rekruta Membru Parlamentu Foinsa’e Nian foun ba periodu dalimak 2023-2025 hodi kontinua fo espasu ba foinsa’e sira mai aprende no desenvolve sira kunhesimentu no kapasidade ba futuru, tanba parlamentu foinsa’e anterior sira  hatudu resultadu no mudansa

Enkuantu, Partisipa iha serimonia plenaria mak hanesan Diretor Jeral Sekretariu Estadu Juventude no Desportu David Tomas de Deus, Representante Presidente Autoriedade Munisipiu Baucau, Adjuntu komandante PNTL Munisipiu Baucau, Veteranus Munisipiu Baucau, Eskuteirus Baucau, Kruz Vermelha Baucau, Fundasaun Uma Paz Baucau.

Jornalista : Augusto dos Santos