SEJD-APFTL : PFN Prepara Ba Kuadrus Futuru Lideransa Kualidade
Dili – Diretor Jeral Sekretaria de Estadu Juventude no Desportu David Tomas de Deus hamutuk ho Alumni Parlamentu Foinsa’e Timor-Leste (APFTL) ensera Formasaun Ba Parlamentu Foinsa’e iha Salaun Catedral Dili, DJ-SEJD David agradese bo’ot ba APFTL ne’ebé organiza formasaun Lideransa, Emprendedorizmu Sosial no Jornalizmu durante loron sia
Tuir DJ-SEJD David hateten formasaun ida ne’e importante tebes ba Parlamentu Foinsa’e atu sira bele aprende liu tan hodi sai futuru lider ne’ebé kualidade no matenek
ʺHa’u lori Sekretaria de Estadu Juventude no Desportu nia naran, hato’o agradese bo’ot ba APFTL ne’ebé organiza formasaun Parlamentu Foinsa’e, ita agradese ba maromak, agradese ba fasilitador sira no agradese ba imi hotu ne’ebé tuir formasaun ida ne’e bele hasa’e imi nia kapasidade di’ak liu tan״. Dehan DJ-SEJD David Tomas de Deus iha nia diskursu enseramentu Formasaun PFN iha Catedral Dili, 14 Maiu 2022
Iha fatin hanesan Presidente APFTL Zaulino Gomes da Silva hateten formasaun Lideransa Báziku, Emprendedorizmu Sosial no Jornalizmu Báziku durante loron sia nia laran bele ajuda sira iha kunhesimentu natón kona ba materia ne’ebé sira aprende
״Alumni Parlamentu Foinsa’e Timor Leste sente orgullu simu responsabilidade organiza formasaun Parlamentu Foinsa’e, maske enfrenta dejafiu, obstákulu no difikuldade barak maibé konsege la’o ho susesu״. Tenik Presidente APFTL Zaulino iha Catedral
ʺFormasaun lideransa bele aumenta sira nia kuñesimentu, oinsa sira lidera nia an rasik, materia emprendedorizmu sosial bele fanun sira oinsa bele halo negosiu iha nia moris, nune’e mos jornalizmu báziku bele loke imi nia hanoin, se imi mehi hakarak sai jornalista iha futuru ״. Nia fundamenta
Entretantu, Membru Parlamentu Foinsa’e Pascoal Jarder fo agradese, apresia no kongratula ba SEJD no APFTL ne’ebé servisu maka’as organiza ami nia formasaun iha faze preparasaun to’o ohin enseramentu
ʺHa’u Agradese no Louva ba SEJD no APFTL ba formasaun sira ne’ebé ami hetan, ami fiar ho formasaun hirak ne’e, ami sei hatutan no habelar fali ba foinsa’e sira ne’ebé iha aldeia, suku no postu administrativo sira ne’ebé seida’uk hetan formasaun sira hanesan ne’e״. Nia afirma
Enkuantu, formasaun ne’ebé la’o durante loron sia, organiza husi APFTL no formasaun ne’e hetan partisipasaun maksimu husi membru Parlamentu Foinsa’e hamutuk 86, tuir planu PFN kuartu periodu ida ne’e sei iha estudu de vizita no plenaria iha tinan ida ne’e, molok sira nia mandatu remata
Jornalista : Sergio Delekuar
Editor : Luis dos Santos Pailofo