SEJD Entrega Premiu Apresiasaun Ba Atleta Prestasaun AUG & SPG 2022
Imajen: Atleta Sea Para Games Simu Premiu Apresiasaun husi SEJD Iha Resintu Edifisiu SEJD Lecidere, Dili segunda 19/12/2022
SAP News TL, DILI: Sekretariu Estadu Juventude Desportu (SEJD) entrega ona premiu apresiasaun ba atleta sira ne’ebe hetan prestasaun medalla 12 iha Sea Para Games (SPG) iha Solo, Indonesia no medalla haat iha Asian University Games iha sidade Ubon Ratchathani, Tailanndia iha tinan 2022.
“Ohin ita mai hamutuk atu atribui premiu ba ita atleta ne’ebe sai manan nain hodi lori medalla mai Timor-Leste iha jogu desportu nivel rejional rua maka AUG iha Tailandia ne’ebe ita nia atleta hetan medalla haat no Sea Para Games iha Indonesia ne’ebe ita nia atleta hetan medalla 12 iha tinan ida ne’e”, dehan MEJD Armindo Maia ba jornalista sira liu husi nia diskursu iha serimonia atribui premiu apresiasaun iha resintu edifisiu SEJD Lecidere, Dili tersa (20/12).
Ministru hatutan, tuir regulamentu ne’ebe maka iha estadu atribui premiu apresiasaun liu husi finanseiru ba atleta manan nain sira ne’ebe hakarak lori oitavu governu nia naran hakarak hato’o parabens ba Atleta manan nain sira hamutuk treinador sira iha jogu AUG no Sea Para Games 2022 ne’ebe hein katak atribuisaun premiu apresiasaun ne’e fo satisfazsaun no insentivu ba atleta sira nia prestasaun hodi enkoraja atleta sira hodi hasae prestasaun no rekor atleta idak-idak ho ekipa nian.
Imajen: Ministru Edukasaun Desportu no Juventude Armindo Maia
Iha fatin hanesan Atleta paralimpiku Teofilo Freitas hatete, premiu ne’ebe nia hetan hakarak agradese ba SEJD ho nia federasaun no treinador ne’ebe rekonese ona nia prestasaun no orsamnetu sira ne’e nia sei utiliza hodi halo preparasaun ba eventu internasional iha tinan oin.
“Premiu ne’e hau hakarak agradese ba SEJD hamutuk CPNTL no federasaun ne’ebe rekoñese ami atleta defisiente hodi distribui premiu ba ami atleta sira ne’ebe manan medalla iha Sea Para Games tinan 2022 iha Solo, Indonesia” tenik Teofilo no orsamentu hau simu sei utiliza hodi halo hau nia preparasaun ba ekipamentu no alimentasaun ba eventu internasional ne’ebe sei realiza iha Cambodia no Guangzhou,China iha tinan oin”, tenik Teofilo
Imajen: Atleta AUG Simu Premiu Apresiasaun husi SEJD Iha Resintu Edifisiu SEJD Lecidere, Dili segunda 19/12/2022
Entretantu atleta paralimpiku sira ne’ebe medalla 12 iha Sea Para Games iha Solo mak husi modalidade atletizmu Teofilo Freitas simu premiu apresiasaun orsamentu montante 10,500 USD, Domingas da Costa hetan 2, 500 USD, Domingos simu 2,500 USD no treinador Odete Amaral hetan 2,500 USD, Husi modalidade hit besi Antonio J. Aniceto simu 3,000 USD ho nia treinador João de Brito hetan 1,500 USD, husi modalidade tenis meza Abelita Borges simu 2,500, Pasquela dos Santos hetan 4,000 USD, Bernardo de Carvalho simu 750 USD, Rogerio Cabral hetan 2,500 USD no ba atleta sira ne’ebe hetan medalla haat iha AUG 2022 mak husi modalidade Felisberto de Deus simu 1,750 USD, husi modalidade voleibol praia atleta Tito Morais hetan 468.75 USD, atleta Joel Valente Savio simu 468.75 USD no husi modalidade Taekwondo Ana da Costa hetan 750 USD.
Reportajen: Augusto dos Santos