SEJD-KOIKA Servisu Hamutuk Fo Treinamentu Desportu Ba Joven 23
SAPNewsTL, Dili : Governu Timor Leste liu husi Sekretariu Estadu Juventude Desportu (SEJD) servisu hamutuk ho Koperasaun Internasional Korea (KOIKA sigla inglesh) fo Treinamentu ba Joven na’in 23 ne’ebe sei sai treinador kona-ba area desportu iha Timor Leste.
Tuir Direktor Jeral SEJD David Tomas Dias hateten ohin halo abertura ba segundu formasaun Coaching Training ka treinador sira ne’ebe mak liu husi KOIKA halo ona selesaun hili sira hamutuk na’in 23 mak tuir treinamentu durante semana ida hodi sai treinador.
“Intensaun husi formasaun ne’e, ita fo treinu ba treinador sira ne’ebe mak ho kuinesimentu ne’ebe pozitivu, nune’e bele kontinua apoiu governu, apoiu federasaun no apoiu dezenvolvimentu espesifiku ba futebol juvenil ba ita nia labarik sira iha Timor Leste,” hatete Diretor Geral Sekretariu Estadu Juventude no Desportu (SEJD) David Tomas de Deus, ba Jornalista sira iha Salaun Luz Clarita Bidau Lesidere,segunda (19/09/22).
Nia dehan, Ida ne’e servisu hamutuk entre governu, Sekretariu Estadu Juventude no Desportu (SEJD) ho KOIKA, halo koperasaun ho sira hodi halo kapasitasaun rekursu umanus, fo formasaun ba joven sira, inklui KOIKA mos fo apoiu ba infraestrutura ba area desportu
Portantu, treinamentu ne’e foka liu ba area 6 mak filozofia coach nian, oinsa mak sira komprende kona-ba labarik ho direitu ba labarik sira nian, teoria kona-ba formasaun ba joven sira, oinsa iha komunikasaun ne’ebe saudavel, aspeitu Jender area desportu nian, inklui prinsipiu husi nutrisaun
Iha fatin hanesan Field Manajer Kooperasaun Internasional Koreia (KOIKA sigla inglesh) MinYoung Lee akresenta, KOIKA fo treinamentu ba Treinador sira ne’e ba dala 2 nian
Entretantu, nia informa antes ne’e KOIKA fo ona treinamentu ba treinador hamutuk ruanulu (20) iha fulan Maiu liu ba, ohin treinamentu ba dala rua ba treinador sira hamutuk 23
“Treinador sira ne’e mos tenke hatene no fokus parte hot-hotu la’os joga bola de’it, agora ami halo selesaun ba treinador sira hamutuk 23 ne’e, kompostu feto na’in 6, mane 17 mak liu husi selesaun hodi tuir treinamentu formasaun ne’e”. tenik nia
Nia salienta, Timor Oan sira gosta area desportu hanesan joga bola, sira mos hakarak aprende maibe dalaruma treinador mak ladun di’ak tanba ne’e sira ne’ebe KOIKA hili presija aprende tan hodi aumenta kuinesimentu
Enkuantu, Treinamentu ne’e dader foka liu kona-ba teoria pratika joga bola, teoria no pratika ba Igualidade Jéneru inklui sira seluk, tuir planu depois de treinamentu, treinador sira sei dezloka ba munisipiu hotu-hotu iha Timor laran tomak hodi hanorin ka fo treinu fila-fali ba labarik sira hahu husi labarik tinan 11 to’o 16 inklui ba sira la’os labarik.
Jornalista : Antonio Tilman & Conzita Mota
Editor : Luis Pailofo