SEJD Prepara Ona Prémiu Ba Atleta Paralimpiku Manan Medalla 12
Sekretariu Estadu Juventude Desportu (SEJD) Abrão Saldanha
DILI- Sekretariu Estadu Juventude Desportu (SEJD) prepara ona Prémiu ba atleta paralimpiku manan medalla 12, osan mean lima, mutin lima no metan 2 iha Sea Para Games 2022 ne’ebe realiza iha Solo, Indonesia.
“Komisaun Nasional Desportu (KND) halo tiha ona desizaun ho deliberasaum no avaliasaun Komite Paralimpiku Nasional Timor-Leste (sigla portuges CPNTL) nia relatóriu ba partisipasaun no númeru nasaun ne’ebe partisipa kompetisaun refere ne’ebe ami deside ona premiu kona ba montante orsamentu hira mak hodi rekonese ba ita nia atleta paralimpikunia ne’ebe hatudu prestasaun hodi hetan medalla osan mean lima, mutin lima no metan rua”, Tenik SEJD Abrão Saldanha ba jornalista sira iha edifisiu CNE Caicoli, Díli sexta (20/10).
Sekretariu Estadu ne’e hatutan, premiu sei fo ba atleta paralimpiku sira ho tipu rua mak premiu eselensia no bolsa nian hamutuk premiu ba treinador sira, orsamentu prosesu ona hein deit atu hasai iha Ministériu Finansas ne’ebe antes sira nia prediksaun ba medalla tolu maibe 12 entaun reajusta fali osan para kobre medalla sira ne’e hotu
Abrão informa, agora SEJD liu husi diresaun alta kompetisaun ko’alia ho CPNTL para hatama pedidu formal mai tuir osan ne’ebe KND iha para depois sira prosesa hodi entrega orsamentu ne’e ba atleta paralimpiku ne’ebe hatudu ona prestasaun iha tinan ida ne’e.
Atleta paralimpiku husi modalidade tolu, para atletizmu, tenis meza no hit besi mak konsege hatudu prestasaun hodi hetan medalla 12 ba Timor-leste iha Sea Para Games 2022.
Jornalista : Augusto dos Santos