Selebra Aniversáriu Kayrala Xanana, Ekipa Avo Nana Realiza Eventu Juvenil

SAPNewsTL, Dili : Iha Ambitu Selebrasaun Loron Aniversáriu Lider Karismátiku Kay Rala Xanana Gusmão ba dala 76, Ekipa Taxa Avó Nana realiza Sertame ba foinsa’e sira, objetivu husi atividade ne’e atu promove foinsa’e sira nia konhesimentu kona-ba siensia no desenvolvimentu Timor-leste

“Atividade sertame ne’e hanesan parte ida husi atividade sira seluk ne’ebé husi ekipa Avo Nana realiza iha ambitu komemorasaun aniversariu ba dala 76, antes ne’e ami hala’o ona atividade balun hanesan futsal, Poezia no semináriu ne’ebe partisipa husi universidade sira”. Dehan Xefe Ekipa Avo Nana Miguel Manutelo ba Jornalista sira iha Salaun Eskola Sta. Madalena de Canossa-Has-laran,Sexta-feira(07/10/2022)

Nia salienta, sertame ne’e partisipasa husi eskola sekundária 15 mai husi eskola privadu no publiku inklui eskola sekundaria Laulara

“Agora ita nia konsentrasaun ba sertame ne’e sei akumula eskola sekundaria hamutuk 15 iha Munisípiu Dili tantu eskola Katólika, Públiku no privadu, tanba eskola sekundaria 15 de’it, eskola Lau-lara hakarak tuir hotu entaun ekipa Avo Nana simu tan eskola Lau-Lara” Dehan nia

Manetelo hatutan, premiu ne’ebe mak sei simu husi manan na’in sira mak primeiru lugar ho montante osan 350 dolar ho sertifikadu, segundu lugar $ 250 dolares, terseiru  lugar $ 150 USD, materia sira ne’e sira prepara maka matematika inklui konhesimentu geral

Xefe Ekipa ne’e realsa, tuir planu atividade sertame ne’e atu implementa hanesan nivel nasionál akumula eskola sekundaria sira hotu husi Munisípiu sira, inklui Rejiaun Administrativa Espesial Oe-cusse Ambenu, (RAEOA) maibé ekipa Avo Nana sei hare ona oinsá realiza atividade ne’e iha futuru

Iha oportunidade hanesan, Reprezentante profesór eskola Sekundaria Públiku númeru um Laulara, António de Jesus do Rego Hatete rajaun husi eskola sekundaria 1 de Laulara tuir sertame tanba estudante sira iha vontade

“Ami nia estudante sira hakarak kompete iha atividade sertame ne’e tanba estudante sira iha vontade hakarak kompete, nune’e bele kualifika sira nia abilidade, liu husi eventu ne’e bele sukat no tulun profesór sira hodi hatene estudante nia koñesementu ne’e to’o iha ne’ebé”. Dehan Professor Antonio

Enkuantu, Manorin ne’e subliña eskola sekundaria jerál Laulara lokaliza iha fronteira entre Munisípiu Dili no Aileu, eskola ne’e rasik dook husi Aileu vila entaun estudante sira ne’ebé eskola iha ne’ebá maioria mai husi Dili, nune’e sira hakarak lori estudante sira mai kompete ho estudante seluk iha Munisípiu Dili.

Jornalista : Marcela da Costa & Esmeralda da Silva

Editor       : Ekipa Editorial