Simu Tomada Posse ! Xefe Suku Lepo Promete Kria Paz & Estabilidade
SAPNewsTL, Covalima : Hafoin Komemora Loron Proklamasaun independénsia unilateral Timor Leste ba dala 48⁰ iha Postu Administrativu Zumalai, Sekretariu Estadu Dezenvolvimentu Lokal (SEDL) fo tomada de posse ba Xefe Suku Na’in ualu (8) ho membru konsellu suku sira.
Iha intervista, Xefe Suku Lepo, Postu Zumalai, Senhor Jacob da Costa sente kontente tanba bele simu konfiansa husi komunidade sira hodi servi sira ba tinan hitu mai.
“Ha’u sente orgullu tanba bele simu konfiansa ne’e, parabens ba komunidade sira hotu iha Postu Administrativu Zumalai ne’ebe fo fiar ba ami hodi servi sira ba mandatu tinan hitu mai”. Tenik Xefe Suku Lepo Jacod da Costa ba SAPNewsTL iha Zumalai, 28/11/023.
Lider Komunitáriu ne’e aprofunda, Nia parte sei esforsu hodi hametin paz no estabilidade, nune’e bele hadia dezenvolvimentu no hadia povu nia moris ho dignu no prosperu ba oin.
“Ami sei esforsu hodi kria paz no estabilidade, hadia dezenvolvimentu no hadia povu nia moris liu husi dezenvolve setor agrikultura, turizmu, edukasaun no ekonomia”. Hateten Xefe Suku Jacob da Costa
Jacob da Costa mos husu ba guvernu sentral hodi halo investimentu sériu ba dezenvolvimentu sosial hanesan Edukasaun, Saude, Agrikultura, no apoia komunidade sira iha area rural hodi hasa’e kresidemntu ekonomia iha baze, nune’e bele hasai povu husi kiak no mukit.
Enkuantu, Partisipa iha Tomade de Posse ne’e maka Sekretaria Estadu Dezenvolvimentu Rural (SEDL), Administrador Postu Zumalai, Konsellu Suku sira, komunidade sira husi Suku Fatuleto, Lepo, Lour, Mape, Raimea, Tazhilin, Ucecai no Zulo
Tuir observasaun, Jornalista SAPNewsTL iha Zumalai nota katak serimonia komemorasaun proklamasaun no tomada de posse ba konsellu suku sira la’o ho hakmatek, partisipativu no felisidade husi komunidade sira.
Jornalista : Conzita Mota