Tinan 20 Independénsia, Komunidade Lereado Kontinua Sunu Kami’i

SAPNewsTL,Lautem: Komunidade Aldeia Lereado, Suku Mahina II, Postu Administrativu Moru, Munisipiu Lautem tinan barak ona seida’uk asesu eletrisidade, Tuir Xefe Aldeia Leradu Abilio Soares hateten sira seida’uk asesu ba eletrisidade husi tempu Indonesia to’o agora maske sira hato’o ona ba parte relevante.  

“Ami nia preokupasaun mak eletrisidade ne’ebé mak durante iha Indonézia nia tempu to’o agora  seida’uk asesu, ami hato’o ona ba Ministeriu relevante maibé nunka tau matan mai ami, Aldeia ida ne’e mos uluk baze funu nian, Falintil sira ho komunidade  subar iha ne’e to’o ita ukan-an, maibé to’o agora seida’uk asesu ba eletrisidade”. Dehan Xefe Aldeia Leradu Abilio Soares iha nia hela fatin Lereadu,Lautem, Tersa-Feira,6/09/2022.

Xefe Aldeia ne’e hatutan, wainhira iha tempu kalan sira kontinua sunu kami’i no balun ne’ebé mak iha osan mak sunu lilin hodi fo roman ba sira.

“Iha tempu kalan inan aman sira sunu minarai no kami’i, balun ne’ebé mak iha osan ka iha kbi’it mak hola solar sell, inan aman ne’ebe mak laiha kbi’it buka kami’i no dalaruma mos sira la hetan kami’i, senti triste  maibé ida ne’e mak rezultadu ka konsekuensia”. Tenik nia

Entretantu, nia mos husu ba governu liu-liu ba Ministeriu relevante atu tau matan ba sira tanba sira mos nu’udár sidadaun Timor.

 “Ami hakarak husu estadu, liliu oitavu governu, ba ministeriu relevante ba asuntu eletrisidade nian bele karik iha tinan ida ne’e ka tinan oin  mai bele haree ka tau matan netik mai ami Aldeia ida ne’e tanba ami mos Timor oan no ami ezije tanba oan sira eskola kalan  atu estuda ahi laiha”. Nia hatete

Enkuantu, iha Aldeia ne’e populasaun hamutuk uma kain haat nulu resin ida no total feto no mane hamutuk atus haat sanulu resin rua.

Jornalista: Absalão Lopes

Editor: Luis Pailofo