Triste & Tanis ! Sarani Timor Reza & Kari Ai-Funan Ba Papa Francisco
Imagem : Sarani Timorense halo venerasaun hodi reza Ba Papa Francisco iha Lecidere, Díli, 22/04/2025
SAPNews TL, Díli : Hanoin ba Sua Santidade Papa Francisco nia mate. Sarani Katolika ne’ebe hela iha kapital Díli hamutuk ho Madre, Padre, Irmão, Irman no frater sira konvoka orasaun dedikatóriu ba apóstolu Francisco liu husi intersesaun Nossa Senhora de Fatima Lecidere.
Tuir sarani Domingos de Oliveira hateten, sarani sira ho laran triste dedika orasaun espesífiku ba Santu Padre Jorge Mario Bergoglio hodi husu Nai Maromak atu fó premiu dame nian ba apóstolu Francisco nia klamar iha lalehan.
“Uluk nanain ha’u sente triste tanba ita lakon bibi atan diak ida ne’ebe fó nia domin mai sarani timoroan tomak, ita hotu mai hamutuk hodi hanoin kona-ba Papa Francisco nia mate, nu’udar sarani ha’u senti lakon ita nia testamuiña fiar nian ne’ebe dedika nia fiar ba maromak hodi servi sarani tomak”.Dehan Domingus Oliveira, ba SAPNews iha resintu Largo Lecidere, Tersa (22/04/2025)
Domingos hatutan nu’udar sarani tenki reflete ba prezensa Papa Francisco nian iha país Timor-Leste ne’ebe lori grasa gratidaun, dame domin no unidade ba familia sira iha altura vizita Sua Santidade Papa Francisco durante loron tolu (3) iha kapital dili, iha fulan Setembru 2024.
“Ne’e duni husu ba ita hotu-hotu atu hasa’e orasaun ba Santu Padre atu nia bele hetan rahun diak iha Nai Maromak nia kadunan santu tanba iha fulan hirak liu ba Sua Santidade mai vizita Timor nia mai halibur sarani tomak halo sarani sira antusiasmu tebe-tebes ho nia prezensa, maibé horseik ita rona novidades tristeza katak Papa Francisco fila hikas ba nai nia uma” Tenik nia.
Nia salienta, sarani sira iha obrigasaun moral no religiosu, organiza malu lori lilin no ai-funan ba iha kadun Nossa Senhora de Fatima Lecidere, sunu lilin iha Nossa Senhora de Fatima nia oin ho tanis hodi hasa’e orasaun ba Nai Maromak atu sadia apóstolu Francisco.
Sua Eminênsia Dom Virgilio Cardeal do Carmo da Silva ho laran triste husu povu timoroan reza atu ba Papa Francisco nia klamar hodi hetan dame rohan la’ek
“Ho laran triste, ha’u konfirma ba povu Timor tomak liu-liu sarani doben sira hotu konaba Sua Santidade Papa Francisco ne’ebe hakotu iis, simu direitamente telfone hosi Vatikano mai hosi Monsenhor Marco Sprizzi fó hatene mai katak Amo Papa nia iis kotu, tuir oras Roma Italia ninian tuku 7:35”.
“Ita hotu sente triste tanba fulan hirak liu ba ita sente ninia prezensa iha ita nia leet. Bainhira nia fila hosi Timor repete nafatin liafuan dehan katak “ha’u nia fuan ne’e iha hela Timor, ha’u nia domin iha hela Timor”, liafuan ne’e nia la koalia iha fatin barak, maibe iha Timor nia espresa ninia liafuan ida ne’e mai ita sarani”. Dehan Virgílio Cardeal do Carmo da Silva iha Lecidere, 21/04/2025
Kardeal Virgílio subliña, Prezensa Santu Padre nian halo povu Timor-Leste senti teb-tebes apóstolu Francisco nia ninia domin iha ema ida-idak nia fiar.
“Loos duni katak nia vizita ita foti hela nia fuan maibe ita mos sente tebtebes oinsa Papa Francisco ninia domin mai timoroan sira iha momentu nia prezensa durante loron tolu iha ita nia leet, nu’udar ema ita hotu laran triste no todan tanba lakon Papa ida ne’ebe ita hotu hadomi maibe nia mate loos iha loron Paskoa ninian. Tan ne’e hakarak konvida sarani sira mai ita hotu reza ba nia”.
Dom Virgílio afirma Dioseze idak-idak sei marka loron ida atu halibur kada Parokia iha idak-idak nia dioseze atu halo mos misa espesial ida ba Amo Papa nia klamar .
“Ba sarani hotu ne’ebe hakarak atu lori ai-funan ruma no oinsa atu reza liu-liu Dili ninian, ita konvida sarani sira hotu, iha monumentu Lecidere, iha Nain Feto nia ain hahu aban tuku 10 ba oin, sira ne’ebe hakarak halo orasaun espesial ruma ba Nain Feto konvida sarani sira mai deit iha monumentu Lecidere, iha Nain Feto nia oin hodi tau Ai-funan no halo orasaun”. Nia husu
Santu Padre hahú hetan moras no grave iha loron 14 Fevereiru no hakotu iis iha loron 21 Abril 2025, Papa Francisco lakon vida ho idade 88 tanba antes ne’e sofre moras pneumonia bilateral.
Jornalista : Ekipa Kobertura