Universidade No Institutu TL 16 Partisipa Ensinu Superior Cup 2022
SAPNewsTL, Dili : Universidade no Institutu Timor-Leste 16 partisipa hodi kompete iha Ensinu Superior Cup ne’ebe realiza husi Ministériu Ensinu Superior Siensia no Kultura (MESSK) hodi komemora aniversáriu ba-dalimak ba loron nasional ensinu superior tanba loron nasional ensinu superior governu rekonese iha loron 17 fulan Novembru 2022.
“Ami realiza kompetisaun ne’ebe kada tinan MESSK halo hodi komemora loron nasional ensinu superior ne’ebe governu rekonese iha loron 17 fulan Novembru 2017, kada tinan MESSK kolabora ho universidade no institutu iha teritoriu Timor-Leste ho aktividade lubuk ida maka desportu ho naran ensinu superior cup, diskursu sientifiku, kreatividade no seminariu sira”. Dehan Diretora Jeral Ensinu Superior Maria F. L. Guterres ba Jornalista sira iha fatin kompetisaun ISC Balide, Dili kinta (15/09).
Entretantu, nia informa partisipa iha kompetisaun ne’e mai husi universidade no institutu hamutuk sanulu resin-neen (16) mak ISC, ISJB, UCT, JSI, UNDIL, IFFS, UNTL, ISFIT, IPB, IPDC, ETCI , DIT, ICS, I0B, UNITAL no UNPAZ
Diretora ne’e akresenta, objetivu ensinu superior Cup 2022 maka sai hanesan enkontru ba estudante universitáriu sira no estrutura eskola sira para kria amizade entre universidade ho Institutu sira no hetan saúde diak
Nia realsa, tinan kotuk halo jogu deit iha kampu SEJD maibe agora halo iha fatin haat mak iha Kampus ISFIT, kampu SEJD, kampus UNDIL no kampus ISC ne’ebe kompetisaun ne’e nu’udar extra kurikular ne’ebe apoiu husi diresaun nasional ensinu superior, enkuantu, modalidade iha kompetisaun ne’e mak futsal ba mane no voleibol ba feto mane, iha ne’ebe ho durasaun jogu hahu loron 15 fulan Setembru to’o loron 1 fulan dezembru 2022
Iha fatin hanesan Reitor Instituto Superior Cristal (ISC) Sebastião Pereira hatete, ohin abertura iha kampus ISC, sira dada rifa iha ne’e, kampu ISC sei sai fatin jogu ba modalidade voleibol iha ensinu superior cup iha tinan ida ne’e
“Ohin ita halo abertura ba ensinu superior cup 2022 ne’ebe partisipa husi universidade no institutu akreditadu iha Timor-Leste hamutuk 16 ne’ebe hala’o ba dahuluk iha Institutu Superior Cristal (ISC) nia fatin tanba kampus ISC sai fatin ba modalidade voleibol nian ne’ebe ami kontente tanba MESSK hili ami nia kampu”, Tenik Reitor
Reitor ne’e hatutan, kompetisaun ne’e ba universidade hotu partisipa para dezenvolve siensia relasaun ho desportu ninian iha ensinu superior sira ne’ebe iha universidade maibe Institutu katólika Formasaun Profesor Baucau (ICFPB) ho Institutu Boavetura Timor-Leste (IBTL) iha Manufahi la mai partisipa
Reitor ne’e Afirma, Ba oin fundasaun ISC sei rehabilita sai hanesan Gym ida para kualidade diak liu tan iha futuru, nune’e bele loke atividade desportiva hanesan futsal, voleibol no basketebol hodi akumula universitariu sira no institutu sira seluk bele utiliza hodi realiza kompetisaun desportu no MESSK bele uza mos halo ensinu superior cup iha futuru
Sebatião mos husu ba universitariu sira husi universidade no institutu 16 katak desportu halo unidade no hametin liu tan relasaun entre ema ho ema no universidade ho institutu, univesitariu sira tenki iha komunikasaun ne’ebe bele prevene problema
“Ha’u nia lia menon ba universitariu sira mai husi universidade no institutu 16 ne’ebe partisipa eventu importante ida ne’e katak atividade desportiva mak halo ita nia unidade no relasaun sai metin liu tan entre ema ho ema, universitariu sira tenki iha komunikasaun para prevene problema no halo kompetisaun diak, ita hamutuk dezenvolve desportu diak liu atu nune’e ema hotu saudável”, Sebastião hateten.
Reportajen : Augusto dos Santos
Editor : Luis Pailofo