Membru Komponente Naval F-FDTL Nain-68 Simu Boina Sai Fuzileiru
(SAPNewsTL)DILI : Hafoin atende formasaun dalimak fuzileiru iha 2022 durante fulan haat, Membru Komponente Naval Falintil Forsa Defeza Timor-Leste (F-FDTL )nain-68 simu boina hodi sai fuzileiru
Tuir Tenente General Falur Rate Laek fo parabens ba Fuzeiru sira tanba ho esforsu, sakrifisiu no dedikasaun durante fulan haat hodi konkista atu tara Boina ne’ebe difisil tebes atu hetan
“Ohin ita fo boina ba fuzileiru foun hamutuk nain-68 ne’e marka tan pasu ida ba vida forsa armada Timor-Leste nian, ita bele hetan forsa ida ne’ebe ita nia nesesidade nasaun presiza, ho esforsu no sakrifisiu barak ona mak ita nia fuzileiru foun sira halo, tanba atu tara boina ne’e difisil tebes presiza fulan haat ho konkista husi empenhu, forsa no dedikasaun, ha’u nia parabéns ba membru foun sira no fo obrigadu ba família ho nia kontribuisaun”, Xefi Estadu Maijor Jeneral F-FDTL Tenente Domingos “Raul Falur Rate Laek” ba Jornalista sira iha nia Diskursu iha Kompenente Naval Hera, Dili sesta (16/09).
Jeneral F-FDTL ne’e fo agradese no obrigadu mos ba komandu estadu maior konjuntu sira, parte lojistika, Ministériu Defeza, parseiru sira, instruktor sira tanba kontribuisaun sira nian ohin hetan rezultadu ho pozitivu, nune’e ohin ofisializa no komponente halo rekrutmentu fuzileiru foun hodi Kompleta ona destakamentu dahuluk hodi kontrola rikusoin iha tasi-laran, ema hotu susar no terus iha tasi ne’ebe misaun ne’e todan maibe tenki kompremitidu para halo.
Falur Rate Laek informa, fuzileiru foun sira konkista istoria foun ida maibe vitória barak sei mai iha oin ho dezafiu no sira iha juramentu leal ba instituisaun lei no estadu
“Ita nia Fuzileiru foun sira konkista istoria foun ida maibe vitória barak sei iha oin sei mai ho dezafiu barak ne’ebe tenki kuida saúde nafatin para sura tan susesu iha oin mai tanba instituisaun fiar ita nia membru sira hodi investe atu serbi ba povu , instituisaun no estadu ne’ebe iha ona juramentu leal ba instituisaun, lei no estadu hodi haree ita nia tasi Timor-Leste ne’ebe nia luan boot liu area terestre iha lina fronteira”, Tenik Jeneral.
Iha fatin hanesan kampitaun Mar no Guerra Egídio Neves hatete, nia sente orgullu hetan fali fuzileiru foun ne’ebe iha kunesimentu no skill hodi halo misaun todan no kaman ne’ebe sei hamutuk hakur tasi boot no satan anin boot
“Ha’u orgullu tebes tanba ami hetan tan fuzileiru foun ne’ebe sei hala’o knaar iha tempu badak ne’ebe iha ona kunesimentu no skill hodi halo misaun todan liu iha oin, nu’udar komandante, ha’u sei ajuda fuzileiru foun sira hodi akompanha sira hasoru todan ka kaman tanba ami hamutuk bele hakur tasi boot no anin boot sei bele satan tanba husi familia mai to’o membru sira inklui komandu servisu hamutuk”. Tenik Kapitaun
Kapitaun ne’e afirma, durante formasaun dalimak fuzileiru nian iha fulan haat nia laran hamutuk ho instruktor Timor oan loron kalan, sira ne’ebe hakaas an, boa vontade no sakrifisiu tomak mezmu ho kondisaun limitadu konsege lori membru foun sira ba rohan
Entretantu, Nia mos fo agradese ba membru foun sira ne’ebe hetan ona formasaun hodi ajuda nia komandante sira no agradese mos ba familia fuzileiru foun sira nian ne’ebe hanoin diak, fuan boot suporta oan sira ne’e ohin loron bele hetan membru foun sira
Egídio fundamenta, nia fiar katak fuzileiru foun sira sei servisu hamutuk iha tempu difisil hodi lori Komponente naval nia naran ba oin hodi jura sei mate hamutuk bainhira nasaun presiza no sira sei halo knaar todan tanba fahe sira iha teritoriu nasional.
“Ha’u fiar katak fuzileiru foun sira sei rona malu, suporta malu para hala’o knaar ho susesu, mai iha kompenente naval, ami jura atu mate hamutuk bainhira nasaun presiza, ha’u hein katak membru foun sira ne’e sei hala’o knaar diak bainhira komandu sira fo misaun ne’e sira sei suporta malu iha tempu difisil hodi lori Komponente naval nia naran ba oin no fuzileiru sira sei hala’o knaar todan liu husi sira nia pasensia no hadomi servisu”, Kapitaun hakotu.
Jornalista : Augusto dos Santos
Editor : Luis Pailofo