Vise Ministru MNEK Vizita United Kingdom No Irlandia, Esperansa Bo’ot Ba TL

SAPNewsTL, Dili : Vice Ministru Negosiu Estranjeiru no Koperasaun (MNEK) Hala’o konferensia  Imprensa iha sala VIP Aeroportu Internasionál Nicolau Lobato kona-ba ninia vizita iha UK no Irlandia, iha vizita Vise Ministru MNEK Julião da Silva konvida Embaxador Inglatera hodi mai Timor Leste no fo agradese ba komunidade Timor oan ne’ebe konsege partisipa iha festa demokrasia iha fulan Abril no Maiu liu ba

“Agradese wa’in tebes ba komunidade timor oan tomak ne’ebe mak iha Irlandia norte no inglaterra ne’ebe fo tempu tomak hodi hasoru malu, no agradese ba komunidade Timor oan sira iha fulan tolu ou haat  kotuk ne’ebe fo ona oportunidade  hodi ezerse sira nia direitu no partisipa festa demokrasia  hodi hili ita nia presidente da républika”. Tenik Vise MNEK iha Sala VIP Aeroportu Nicolau Lobato Segunda, 12/09/2022

Vise Ministru ne’e hatutan, Timor oan barak mak hela iha rai liur hala’o atividade ekonomika, governu hanoin planu ida atravez liu husi orientasaun,Sua Exelensia Primeiru Ministru nian atu oinsa enkoraja Timor oan mos bele partisipa iha direita no indireitamente  iha prosessu dezenvolvimentu ekonomia nasaun nian.

Entretantu, Nia hateten objetivu husi vizita ne’e mos atu fanun Timor oan sira iha ema nia rain hodi promove Timor Leste ba mundu

“Vizita ne’e mos husu ba ita nia komunidade Timor oan iha Diaspora nia kontribuisaun hodi promove ita nia identidade  nasaun nian, promove ita nia produtu lokal ba nasaun sira ne’ebe ita nia komunidade Timor oan sira hela ba”.Tenik  Vice Ministru MNEK Julião da silva

Entretantu, Governate ne’e sublina, governu mai ho politika ida oitavu governu Konstituisional atraves liu husi  Primeiru Ministru General Taur matan Ruak hanoin hodi estabelese  Sekretaria Estadu ida ba Timorense, oinsa mak atu bele liga direitamente ho  Timor oan sira ne’ebe mak hala’o sira nia akltividade ekonomika iha rai-seluk hodi bele promove produtu ne’ebe Timor Leste ba Mundu.

Enkuantu, iha loron 11 fulan Agostu,  Sua Exelénsia Primeiru Ministru hatun despaixu hodi fo delega kompetensia ba Vice Ministru Negosiu Estrajeiru no Koperasaun asume kargu hanesan sekretaria estadu komunidade ba Timor oan sira iha Diáspora, tanba servisu ida ne’e sei ligada ho Ministériu Negosiu Estranjeiru no Koperasaun

Alende ida ne’e, Vise Ministru MNEK no Sekretariu Estadu Ba Komunidade Timor Oan Iha Diáspora vizita Reinu Ùnidu, Embaixador Inglatera nian ba Timor Leste iha Zakarta, nune’e mos Sekretáriu ne’e konvida Embaixador Inglatera, portantu iha fulan Novembru Embaixador sei mai Timor Leste hodi ko’alia oinsa Timor oan bele ba servisu no halo paseu iha Inglatera

Jornalista : Aquelina Mangalhães

Editor       : Ekipa Editorial