Kandidatu Eliminadu 842 Kestiona Prosesu Rekrutamentu F-FDTL 2022

SAPNewsTL, Dili: Kandidatu eliminadu iha selesaun Falintil Forsa Defeza Timor-Leste (F-FDTL) 2022, kandidatus nain-842 la satisfaz ba komisaun rekrutamentu membru foun iha instituisaun F-FDTL, ne’ebé deskonfia adopta sistema familiarizmu
“Ami husi Kandidatu nain-842 ne’ebé eliminadu ba F-FDTL tinan 2022 lamenta ho komisaun rekrutamentu F-FDTL nian, ne’ebé mak taka rezultadu finál iha munisipiu sira, tanba la bazeia ba anunsiu informasaun rekezitu ba rekrutamentu ne’e rasik ne’ebé Ami konsidera katak rekrutamentu ba kandidatu membru foun hanesan formalitas de’it ba Públiku hodi fó hatete iha rekrutamentu maibe uza sistema familiarizmu”, deklara porta Voz Paulo Gonsalves ba jornalista sira liu husi konférensia imprensa iha Jardin Largo Lecidere, Díli sabadu (10/09/2022).

Porta Voz ne’e akresenta, Ligadu ba rekezitu rekrutamentu nia anunsiu katak, ba kadete sira ne’ebé la prense kritéria espesífiku no jerál hanesan la pasa iha teste altura, matan, tilun sei elimina ka hasai kedas, signifika kandidatu refere sei la pasa iha rezultadu finál, maibé bazeia ba rezultadu finál ne’ebé maka fó sai iha dia 06 de Setembru 2022, sira haree lolos katak iha kandidatu balun ne’ebé maka elimina iha tempu ne’eba, sira nia naran sai fali iha rezultadu finál no sira ne’ebé maka tuir teste to’o remata naran la sai fali.

Nia Informa, rekrutamentu ne’e sira haree kandidatu eliminadu iha prosesu teste nian naran sai fali iha rezultadu finál. Tan ne’e sira husu ba Ministériu Defeza no instituisaun F-FDTL atu tau matan ba sira nia asuntu refere.
Reprezentante kandidatus ne’ebé elimina ne’e mós haforsa liu tan nia lamentasaun no mos kestiona ho komisaun nia pontuasaun iha anunsiu rezultadu husi rekrutamentu refere.

“Rekrutamentu ba daruak ne’e ami haree, kolega kadete balun ne’ebé maka uluk la liu iha seleksaun dokumentu no la tuir teste iha tinan kotuk 2021, iha rekrutamentu tinan 2022, sira nia naran sai fali hodi ba tuir teste, ikus mai sira nia naran sai iha rezultadu finál tanba ne’e ami husu ba Ministeriu Defeza liuliu ba instutusaun F-FDTL atu toma atensaun, komisaun organizador nia anunsiu rezultadu rekrutamentu F-FDTL latuir data ne’ebé determina iha finál, lolos teste hotu-hotu remata iha dia 22 de Agostu 2022 maibé mosu iha fali dia 25 de Agostu 2022”, tenik Paul

Entretantu, juventude hirak ne’e husu klarifikasaun husi komisaun Rekrutamentu F-FDTL ba Tinan 2022 tanba sira konsidera hanesan familiarizmu iha Instutuisaun F-FDTL laran, sira husu mos ba xefe estadu Maijor Jeneral Tenente Domingos Raul “Falur Rate Laek” atu bele haree didiak komisaun rekrutamentu hodi bazeia ba rekejitu ne’ebé anunsiu iha públiku

Nia sublinha, sira hare’e no senti rasik sira ne’ebé teste fiziku no saúde liu iha finál naran la sai iha membru F-FDTL foun maibé sira ne’ebé la tuir teste iha fiziku no saúde hetan eliminasaun naran sai laliu iha membru foun ne’ebe sira mos hatama ona sira nia evidensia ba Ministeriu Defeza maibe sira seidauk hetan resposta husi ministériu defeza.

Iha fatin hanesan kandidatu eliminadu Domingas Pinto hatete, sira la satisfaz ba komisaun rekrutamentu tanba la foku no halo rekrutamentu ho familiarizmu maski juventude barak hakarak serbi ba nasaun ne’e.

“Ami la satisfaz ba komisaun rekrutamentu tanba ema nia idade liu tiha naran taka sai to’o ba prosesu teste komisaun dehan fali tinan liu tiha ona no halo rekrutamentu familia sira iha laran deit mak liu ne’ebe ami husu komisaun hare’e ba ida ne’e tanba juventude hotu hakarak serbi ba rai ne’e”.

enkuantu, joven ne’e husu atu ba futuru, labele halo rekrutamentu ne’ebe haree ba familia maibe haree ema hotu hanesan no halo tratamentu ne’ebe justu tuir rekejitus ne’ebe vigora

Jornalista : Augusto dos Santos
Editor : Ruivo Bonat