Zebra Kontra Lica Lica Lemorai Impata Ho Skore 0-0

SAPNewsTL, Dili: Zebra FC kontra Lica Lica Lemorai impata ho skore 0-0 iha jornada datoluk divizaun daruak Liga Timorense epoka 2023 ne’ebe klube rua fahe pontu ida-ida ba malu iha jogu ne’e.

Jogu entre Zebra FC kontra Lica Lica Lemorai hala’o iha Estadium Munisipal Dili domingu, (19/03/2023).

Iha jogu parte dahuluk bainhira kick off jogador husi ekipa rua muda bola ain ba ain hodi halo presaun no atake ba malu ne’ebe jogador sira husi Lica Lica Lemorai halo presaun makaas ba ekipa adversariu tanba Zebra FC lakon iha lina klaran nian, ho presaun ne’e ekipa Lica-Lica Lemorai nia avansadu sira hetan oportunidade barak ameansa baliza adversariu maibe la konsege marka golu no Zebra FC mos halo kontra atake hodi hetan oportunidade balun hodi ameansa baliza Lica Lica Lemorai maibe la konsege marka golu mos, jogu parte dahuluk minutu 45 remata ho skore okulista 0-0.

Kontinua ba parte daruak ekipa rua muda estratejia joga nian tanba Zebra FC halo substituisaun ba jogador nain lima iha lina defeza, klaran ho avansadu no Lica Lica Lemorai troka jogador nain haat iha lina avansadu, klaran no defeza hodi halo nafatin presaun ba malu ne’ebe jogador sira husi ekipa rua nafatin hetan oportunidade ameansa baliza kada ekipa maibe la konsege marka golu, tama ba minutu 90+4 ekipa Lica Lica Lemorai hetan suta penalidade maibe jogador Liborio Jeronimo sai nu’udar ezekutor la konsege marka golu tanba baliza Zebra FC asegura nia redi hodi baku sai bola husi jogador adversariu ne’ebe jogu minutu 90 remata skore nafatin 0-0 hodi rezulta ekipa rua tenki fahe pontu ida-ida ba malu iha jornada datoluk divizaun daruak Liga Timorense epoka 2023.

Depois jogu remata treinador Lica Lica Lemorai Nelson Soares hatete, sira nia jogador hetan oportunidade barak maibe faila iha finalizasaun ne’ebe sira sei hadia iha jogu tuir mai.

“Ohin hau nia jogador sira hetan oportunidade barak atu marka golu maibe faila iha finalizasaun no sorte la iha karik oportunidade barak ne’e mak jogador sira marka golu ami nia golu barak tanba ami domina bola ne’ebe ami sei hadia ami parte finalizasaun para jogu tuir mai bele hetan pontu ruma”, tenik Nelson 

Iha sorin seluk treinador Zebra FC Antonio Mok dehan, nia orgullu ba jogador sira no sei hadia lina avansadu iha jogu tuir mai para finaliza golu tanba ohin sira hetan oportunidade barak maibe la konsege marka golu 

“Hau orgullu ba hau nia jogador sira tanba tuir lolos ohin ami lakon maibe hau jogador baliza baku sai bola suta penalidade husi adversariu iha minutu ikus nian no ami sei hadia hodi fo treinu ba ami lina avansadu para jogu tuir mai finaliza golu para ami bele hetan pontu ruma tanba ohin ami hetan oportunidade barak maibe avansadu la finaliza hodi marka golu”, Antonio hateten

Antonio hatutan, ohin jogu sira faila iha lina klaran tanba sira hetan difikuldade iha iha lina defeza tanba akumulasaun kartu lakon jogador importante ida nakonu ho esperensia sempre motiva no hakalma jogador sira seluk iha kampu laran entaun ohin jogador sira mesak foun deit joga la kalma hanesan iha jogu antes ne’e.

Entretantu rezultadu jogu refere lori Zebra FC provizoriu okupa pozisaun dahaat ho pontu 4 iha tabela klasifikasaun jornada datoluk divizaun daruak Liga Timorense epoka 2023 husi manan ida, impata ida no lakon ida no Lica Lica Lemorai FC okupa pozisaun dalimak ho pontu 4 husi jogu manan dala ida, impata ida no lakon ida ne’ebe pontu ekipa rua hanesan maibe Zebra FC liu produtividade golu ho Lica Lica Lemorai FC.

 

Reportajen: Augusto dos Santos