World Cup : Portugal Domina, RD Congo Resiste Rezulta Empate 1 a 1, Adeptu La Halo Komboiu
Imajem : Espesial. Foto : FIFA World Cup
SAPNewsTL, Houston : Durante 90 minutu, Portugal hatudu kualidade no dominasaun hanesan ekipa ida hosi kandidatu forte iha kopa Mundial 2026. Rezultadu hatudu selesaun nasionál rua impata ho skore 1 a 1.
Conzita Mota – Sapnews Pro
Durante jogu, selesaun nasionál Repúblika Demokrátika Congo hatudu disiplina, rezisténsia no espíritu luta hodi tahan presaun to’o partida remata ho empate 1-1 iha Houston Stadium, quinta-feira (18/6/2026).
Hahú hosi apitu inísiu, Portugal la fó tempu ba adversáriu atu organiza-an. Ekipa ne’ebé lidera husi gerasaun foun futebol portugés toma kontrolu ba bola no kontinua halo presaun iha metade kampu RD Kongo.
Dominasaun ne’e lori rezultadu lalais. Iha minutu neen, Pedro Neto haruka kruzamento loos ba área penalti no João Neves salta aas atu halo kabesada ida ne’ebé la bele hapara husi guarda-redes Lionel Mpasi. Nune’e Portugal halo golu ida ba RD Congo hodi muda ba skore 1 a 0.
Hafoin golu dahuluk, Portugal kontinua buka golu daruak. Nuno Mendes, Bruno Fernandes no Bernardo Silva repetidamente kria oportunidade, maibé la konsege aumenta golu.
Enkuantu ne’e, RD Kongo passa maioria tempu iha defesa. Maibé ekipa afrikanu ne’e la perde nia organizasaun no kontinua buka oportunidade atu responde liu husi kontra-atake no bola parada.
Momentu ne’ebé muda atmosfera partida mosu iha tempu akrésimu babak dahuluk. Iha minutu 45+5, Arthur Masuaku haruka bola ba área penalti no Yoane Wissa, ne’ebé la hetan markasaun, konsege halo kabesada forte ida atu hakotu baliza Diogo Costa. Gol ne’e muda skor sai 1-1 molok intervalu.
Bainhira tama ba faze daruak, Portugal aumenta tan intensidade atu buka golu ba vitoria. Adeptu sira espera atu haree reasaun hosi Selesaun das Quinas ne’ebé kontinua domina posse de bola no kria oportunidade balu.
Maibé loron ne’e sai loron ida ne’ebé linha defesa RD Kongo no guarda-redes Lionel Mpasi hala’o servisu extraordináriu. Kada tentativa Portugal nian hetan resposta husi organizasaun defensiva ne’ebé metin.
Iha tempu hanesan, RD Kongo mos la limita-an ba defende deit. Sira tenta aproveita espasu iha kontra-atake, obriga Portugal atu nafatin kuidadu iha liña kotuk.
Portugal kontinua presiona, enkuantu RD Kongo luta atu mantein empate ne’ebé importante ba sira. Adeptu sira iha Houston Stadium akompanha partida ho emosaun to’o árbitru hakotu jogu.
Rezultadu impata ne’e hatudu, adeptu sira iha Dili, Timor-Leste la konsege halo komboiu tanba Portugal la hetan vitória kontra RD Congo.
