Dr. Lu Olo Orgullu Simu Resultadu Ho Hakmatek no Parabeniza Dr. Ramos Horta Nia Vitória Iha Eleisaun Ronda Daruak
SAPNewsTL, Luz-Clarita, Dili, 22 Abril 2022 : Rezultadu Provizóriu hosi Eleisaun Prezidênsial segunda ronde hatudu ona katak kandidatu Dr. José Ramos Horta maka sai prezidente Repúblika ba periodu 2022-2027. Dr. Francisco Guterres Lu Olo hateten, Ha’u simu rezultadu segunda ronde ho laran hakmatek no ksolok tamba povu rasik maka hili ninia Prezidênte Repúblika ba tinan lima tuir mai.
Dr. Francisco Guterres Lu Olo fo Parabens ba Dr.José Ramos Horta hanesan Prezidênte eleitu ba mandatu 2022-2027, ha’u fiar katak ita bo’ot sei koopera ho Parlamentu Nasional, VIII Governu Konstitusional no Tribunal Rekursu atu hatutan konkista sira be’ebé ita hetan ona iha tinan lima liubá. Dehan Lu Olo iha nia deklarasaun. Luz-Clarita, 22/04.
Entretantu, Dr. Francisco Guterres Lu Olo mos fo parabens ba povu Timor-Leste ne’ebe hatudu maturidade polítika tamba hatene hametin ambiente páz, trankuilidade no estabilidade iha tempu kampaña no eleisaun presidente ronda daruak.
Dr. Lu Olo hatutan, Ha’u aproveita loron ohin hodi hato’o agradesimentu públiku ba sekretáriu jeral FRETILIN Dr. Mari Alkatiri no estrutura tomak iha nivel nasional to’o baze ne’ebé servisu ho esforsu no dedikasaun tomak atu garante ha’u nia vitória ba mandatu daruak,nu’udar Prezidênte Repúblika.
Ba kampaña segunda ronda ha’u haksolok tebes ho partisipasaun direta hosi Prezidênte Partidu PLP Jeneral Taur Matan Ruak no Konselleru Partidu KHUNTO Bou Naimori lideres hosi partidu rua ne’e ne’ebé partisipa iha kampaña daruak ka hahú kedas iha kampaña dahuluk,ha’u hato’o ha’u nia agradesimentu.
Ha’u agradese mós apoiu hosi partidu ’’Os Verdes” ne’ebé deklara apoiu ba ha’u nia kandidatura iha kedas primeira ronda.Agradese mós ba kuadrus partidu PUDD, Frente Mudansa, Organizaun hotu-hotu Rezistênsia nian, Organizasaun arte marsiais no rituais no siadadaun ida-idak ne’ebé apoia ha’u-nia kandidatura no hala’o kampaña iha fatin-fatin iha rai-laran no rai-liur. Tenik Lu Olo
Agradese mós Tribunal Rekursu,Orgaun Eleitoral STAE,CNE,Fiskais no Observadoser Nasionais no Internasionais ho ida-idak nia servisu. Lahaluha agradese mós ba PNTL ne’ebé hanesan iha ronde dahuluk,hatene kumpre nia dever mantein órdem di’ak iha territóriu tomak iha kampaña daruak no eleisaun Prezidênsial iha 19 abril 2022. Biar akontese insidente balun, ita bele sente orgullu nu’udar paíz tamba ita konsege hala’o votasaun dala rua iha ambiente hakmatek, livre, demokrátiku no ho órdem públika.
Enkuantu, Dr. Lu Olo hateten, Nu’udar kandidatu no nu’udar mós Prezidênte Repúblika, ha’u apela ba povu tomak atu simu rezultadu hosi eleisaun Prezidênsial 19 abril 2022 ho laran hakmatek no ksolok atu ita hotu bele moris nafatin ho páz no estabilidade, dezenvolve ita-nia rai doben ba hasa’e moris-diak ba ema hotu no hametin justisa sosial. Lu Olo hateten, Dili, 22 Abril 2022.
Jornalista : Geraldo da Gama
Editor : Sergio Delekuar