Bispu Leandro Fo Segredu Fuan Hakmatek Nian Ba Sarani Sira

SAPNewsTL, Lautém: Durante Prezide Misa Solenidade ba Krismadu sira iha Parokia Luro, Bispu Dioseze de Baukau, Dom Leandro Maria Alves hatete Sarani diak tenki halo konfesaun, Konfesaun ne’ebe buka la repete ninia sala hotu hotu

“Dons Espíritu Santu iha hitu, atu konfesa didiak presiza halo buat lima, Hanoin buka sala hotu hotu, Hanoin buka sala hotu hotu ho laran moras, Hakaas an hodi la sala tan, Konfesa sala hotu hotu ba Amu Lulik no Rona peniténsia ne’ebe Na’i Lulik Haruka”. Tenik Bispu Dioseze Baukau Dom Leandro Maria Alves liu husi Omilia ba sarani sira iha Luro,21/08/2023

Dom Leandro hatutan, simu espíritu santu hodi renova, transforma no fo sasin kona ba Kristu, ne’e duni simu espíritu santu hodi loke fuan no neon nu’udar sasin ba Maromak

“Ita simu espíritu santu hodi loke ita nia fuan no neon hodi fo sasin ba Kristu, buka hafoun an lor loron, foun iha moris, foun iha hahalok, labele feto mane sai tolok ten, buka koalia liafuan ne’ebe diak iha inglês no português”. Nia dehan

Bispu Dioseze Baukau ne’e fundamenta, aprende buat diak hodi halo buat ne’ebe diak ne’e mak halo ema vale ba família, sosiedade no nasaun

“Ita halo buat diak ne’e mak halo ita vale ba família, sosiedade no nasaun, ne’e duni ohin ita simu espíritu santu ne’e tenki halo ita sai sasin na’in no domin na’in iha Komunidade nia leet”. Nia subliña

Nia akresenta, Wainhira ema hotu halo ida ne’e maka nia fuan no neon sei hakmatek no moris sei Kontente iha Komunidade ida

“Ita nia laran sei hakmatek, wainhira ita halo buat hirak ne’e, ita tenki hadomi malu, respeita Malu no perdua malu, imi tenki ba halo konfesaun no badinas ba misa iha kada domingu”. Nia teni

Partisipa iha Selebrasaun ne’e mak hanesan Krismadu hamutuk 542, Aman Inan sarani Sira, Autoriedade Sivil sira no sarani Parokia Nossa Senhora Ranha dos Apóstolos de Luro

Jornalista: Luis Pailofo