Academica FC Prontu Asegura Pontu Tolu, AS Ponta Leste otimista Manan 1-0
Imajen: Prezidente Academica FC Gil da Conceicão ho Treinador Luisinho dos Santos Saco iha Estadium Munisipal Dili sesta (17/02/2023)
SAPNewsTL, Dili: Academica FC prontu asegura pontu tolu kontra AS Ponta Leste iha loron domingu 19 fulan fevereiru 2023 maibe AS Ponta Leste mos otimista sei manan Academica FC ho skore 1-0.
“Ami hatene katak AS Ponta Leste ne’e klube zigante Hau prepara ona hau nia jogador durante treinu sira ne’ebe hau fiar ona sira katak sira sei kompete diak hodi hatudu jogu diak asegura pontu tolu kontra AS Ponta Leste iha loron domingu 19 fulan fevereiru 2023”, treinador Academica FC Luisinho dos Santos Saco ba jornalista sira liu husi konferensia imprensa iha Estadium Munisipal Dili sesta (17/02/2023).
Treinador hatutan, jogador sira ne’ebe Academica FC prepara ona kompete iha Liga Timorense epoka ne’e mak husi estranjeiru nain tolu husi Holanda ho Indonesia, sira nain tolu sei joga iha pozisaun avansadu, mediu no defeza hamutuk ho lokal sira ne’ebe antes ne’e lori klube hakat mai divizaun dahuluk Liga Timorense no jogador lokal sira seluk husi klube Timor-Leste sira seluk.
Enkuantu prezidente Academica FC Gil da Conceicão aumenta tan, depois Academica FC rona Liga Timorense epoka 2023 atu hahu iha fulan fevereiru husi FFTL, LFTL ho SEJD, sira halo kedas preparasaun hodi kontratu jogador ne’e sira nia jogador prepara ona atu hatudu jogu diak ba adeptu sira kontra AS Ponta Leste iha loron domingu 19 fulan fevereiru 2023.
Prezidente akresenta, AS Ponta Leste ne’e ekipa zigante nakonu ho jogador selesaun nasional maibe Academica FC mai ho jogador espiritu foun husi divizaun daruak mai divizaun dahuluk Liga Timorense ho motivasaun boot prontu atu hasoru ekipa se deit inklui AS Ponta Leste iha loron domingu ne’ebe jogu minutu 90 mak sei determina rezultadu hodi nune’e se mak sei sai husi kampu foti oin no hakruk
Imajen: Treinador AS Ponta Leste Edi Fernandes iha Estadium Munisipal Dili sesta 17/02/2023
Iha fatin hanesan treinador AS Ponta Leste Edi Fernandes hatete, sira halo ona preparasaun durante fulan ida resin ne’ebe preparadu kontra Academica FC otimista sei manan ho skore 1-0.
“Ami halo ona preparasaun durante fulan ida resin no mos try out ho klube sira seluk iha divizaun dahuluk no daruak Liga Timorense epoka ne’e ne’ebe ami nia klube preparadu hodi kontra Academica FC iha loron domingu 19 fulan fevereiru 2023, ami otimista sei manan Academica FC ho skore 1-0”, tenik Edi
Edi informa, jogador sira ne’ebe AS Ponta Leste prepara ba Liga Timorense epoka ne’e, sira sei lori jogador lokal sira deit ne’ebe rekruta husi klube sira seluj hamutuk ho jogador tuan sira ne’ebe ho jogador sira sira fiar katak sei manan Academica FC iha loron domingu.
Entretantu historia As Ponta Leste kontra Academica FC iha Liga Timorense hahu iha 2015 to’o 2021 ne’e , AS Ponta Leste foin lakon dalan ida no empata dala ida kontra Academica FC.
Reportajen: Augusto dos Santos