Aitana Manan Porto Taibesse Ho Skore 2-1 Iha Abertura Liga Timorense 2023

SAPNewsTL, Dili: Aitana FC manan Porto Taibesse FC ho skore 2-1 iha jogu abertura divizaun dahuluk Liga Timorense epoka 2023 ne’ebe vitoria ida ne’e Aitana FC hetan pontu tolu dahuluk iha liga tinan ne’e.

Jogu abertura entre Aitana FC kontra Porto Taibesse FC hala’o iha Estadium Munisipal Dili sesta 17/02/2023.

Iha jogu parte dahuluk bainhira arbitrajen huu kick off jogador 11 husi  Aitana FC halo kedas  atake ba adversariu ne’ebe jogador Aitana Jilson dos Reis marka golu iha minutu ida husi tiru bola falta ba baliza Porto Taibesse FC la konsege asegura nia redi hodi muda skore ba 1-0.

Skore 1-0 halo Porto Taibesse FC nia jogador sira aumenta ritmu jogu hodi halo presaun makaas ba baliza Aitan FC para halo impata skore maibe Aitana FC mos la fo oportunidade ba sira no Aitana FC mos halo kontra atake atu aumenta tan golu maibe to’o minutu 45 remata skore nafatin 1-0.

Tama ba jogu parte daruak ho skore 1-0 halo jogador Porto Taibesse FC halo presaun makaas ba Aitana FC hodi nune’e sira hetan falta penalidade tanba baliza Aitana FC halo falta hasoru jogador adversariu iha area 16 nian ne’ebe jogador Porto Taibesse FC Edencio da Costa konsege marka golu hodi halo redi adversariu nakdoko iha minutu 54 hatuur skore 1-1.

Skore 1-1 halo ekipa rua nafatin halo presaun no kontra atake ba malu hodi anima tebes adeptu sira iha Estadium Munisipal Dili maibe tama ba minutu 88 jogador  estranjeiru Mamoudou Conde  Aitana FC nian husi Guinea konsege marka ba ekipa adversariu hodi muda skore ba 2-1 ne’ebe hela minutu 2 tempu normal minutu 90 remata ekipa rua la aumenta tan golu ne’e minutu 90 remata skore nafatin 2-1 hodi halo Aitana FC konkista pontu tolu iha jornada dahuluk divizaun dahuluk Liga Timorense epoka ne’e.

Depois Jogu remata treinador Aitana FC Jose Fonseca dehan, nia hakarak fo parabens ba ekipa tanba antes ne’e sira hakarak manan iha jornada dahuluk Liga Timorense epoka ne’e

“Ha’u hakarak fo parabens ba ami nia ekipa ne’ebé ohin hatudu jogu di’ak no ikus mai ami manan tanba antes ne’e ami hakarak manan iha jornada dahuluk ne’e iha divizaun dahuluk Liga Timorense epoka 2023”, tenik Jose

Iha sorin seluk jogador Porto Taibess FC Eusébio de Almeida hatete, normalmente iha jogu ida tenki manan no ida lakon ne’ebe sira hadia diak liu iha jogu tuir mai tanba sei iha hela jogu dala neen

“Normalmente iha jogu sempre iha ekipa ida manan no ida lakon, maski ohin ami hatudu jogu  tuir estratejia treinador nian maibe tanba preparasaun minimu fulan ida deit no liga ne’e kleur tebes  afeita mós ba ekipa nia performasaun maibe hau fiar katak jogu tuir mai ami sei hadia jogu diak liu tan tanba sei iha hela jogu dala neen”, Eusebio hateten

Reportajen: Augusto dos Santos