Liga Timorense 2023, Coração Halakon Karketu Ho Skore 2-1

SAPNewsTL, Dili: FC Coração/Atletico Ultramar konsege halakon klube zigante Karketu Dili FC ho skore 2-1 iha jornada dahuluk divizaun dahuluk Liga Timorense epoka 2023.

Jogu Coração/Atletico Ultramar kontra klube zigante Karketu Dili FC hala’o iha Estadium Munisipal Dili sabadu 18/02/2023.

Iha jogu parte dahuluk arbitrajen huu kick off ekipa rua halo kedas presaun no atake ba malu ne’ebe tama ba iha minutu 4 jogador  Pascoal Fernandes husi Coração/Atletico Ultramar FC marka golu liu husi suta iha area penalidade laran ne’ebe halo baliza Karketu Dili FC la konsege asegura nia rede husi ekipa adversariu ho muda skore ba 1-0.

Skore 1-0 halo Karketu Dili FC hasae ritmu jogu halo presaun ba adversariu no Coração/Atletico Ultramar mos halo kontra atake makaas maibe to’o iha minutu 45+3 jogador Galvanio Alberto husi Karketu Dili FC marka golu liu husi ulun bainhira hetan bola husi nia kolega suta bola falta hodi hatuur skore 1-1 halo parte dahuluk minutu 45 remata ho skore impata ne’e.

Kontinua ba jogu parte daruak nian klube rua nafatin halo presaun no atake ba malu tanba sira hakarak manan jogu ne’ebe anima tebes adeptu sira entaun to’o iha minutu 85 jogador Romulo Escurial husi Coração/Atletico Ultramar marka tan golu ida hodi muda skore ba 2-1, hela minutu 5 ikus jogador Karketu Dili FC hasa’e ritmu jogu makaas liu tan atu hetan oportunidade hodi marka golu halo impata maibe jogador ekipa adversariu la fo oportunidade ne’e to’o tempu normal minutu 90 remata skore nafatin 2-1 hodi lori FC Coração/Atletico Ultramar manan Karketu Dili FC hodi hetan pontu 3 iha divizaun dahuluk Liga Timorense epoka 2023.

Depois joga remata treinador FC Coração/ Atletico Ultramar Januario de Almeida hatete, manan jogu ohin orgullu boot ba treinador ne’ebe manan klube zigante no esperansa tuir sei hatudu jogu diak para hetan vitoria nafatin.

“Manan jogu kontra Karketu Dili FC ne’e orgullu boot ida treinador ho ekipa tanba ami nia ekipa foin avansa ne’ebe sorte ba ekipa manan ekipa zigante ne’ebe forsa maibe ami mos forsa ne’ebe rezultadu iha kampu mak determina no esperansa ba jogu tuir hakarak hetan vitoria nafatin tanba ami sei hadia falla sira iha jogu ohin hodi hatudu joga diak liu tan hasoru ekipa sira seluk”, tenik Januario

Iha sorin seluk asitente treinador Karketu Dili FC Antonio Timotio parabeniza ba ekipa FC Coração/Atletico Ultramar, maske la manan iha jogu dahuluk ne’e maibe, nia promete sei hadia diak liu tan hodi prepara ba jogu tuir mai

“Lalaok  jogu mak hanesan maski jogador esforsu hotu maibe rezultadu ikus Vantajen boot ba adversariu, tan ne’e ami fo parabens ba FC Coração/Atletico Ultramar ne’ebe hetan pontu tolu ne’e ami sei hadia falla iha jogu ohin hodi fuan boot nafatin ba jogu tuir mai”, Antonio dehan

Nia hatutan, sira jogador estranjeiru seidauk hatudu jogu hodi fo rezultadu diak ba klube tanba sira seidauk halo adapatasaun diak ho jogador lokal sira depois jogu tuir sira sei halo sira adapta ho jogador lokal sira.

Reportajen: Augusto dos Santos