Administrador Luro Agradese Parlamentu Foinsa’e, PFN Identifika Problema & Transmite Solusaun

SAPNewsTL, Dili: Parlamentu Foinsa’e Postu Administrativu Luro, Munisipiu Lautem tersa-feira liu ba, Hafoin hasoru malu ho Administrador Postu Administrativu Luro (APAL) hodi apresenta problema sira ne’ebe foinsa’e sira hasoru, APAL Augusto Feliciano Ramos Branco agradese ba parlamentu foinsa’e nia envolvimentu iha dezenvolvimentu Timor-Leste nian ne’ebe ajuda lider komunitariu sira nia servisu iha baze liuliu ba identifika problema no buka solusaun problema ne’ebe mosu iha aldeia sira

“Ha’u agradese no orgullu tebes ba membru Parlamentu Foinsa’e Periodu dahaat nia prezensa ohin mai hasoru ami iha ne’e, katak sira nia envolvimentu dezenvolve ita nia rai ne’e, ha’u lori populasaun nia naran orgullu tebe-tebes tanba ita bele kunese ona problema ne’ebe akontese iha Timor-Leste liuliu Luro hodi apoiu lider komunitariu liuliu atu bele buka solusaun, ba ita nia inan aman bele senti katak durante problema sira ne’e ita entidade hotu-hotu bele servisu hamutuk kolabora hamutuk buka no solusiona ita nia inan aman sira nia problema”, dehan administrador postu administrativu Luro Augusto Feliciano Ramos Branco ba Jornalista SapNewsTL Tersa-Feira (03/01).

Administrador hatutan, Kona-ba eskola Ailarino ninian depois sira rona ona informasaun husi komunitario Luro nian, momentu ne’eba kedan sira relata oralmente ba sira nian superior atu bele atende urgente, sira husu lider komunitariu sira mos tenki hatama relatoriu tamba sira nia superioridade sira presiza relatoriu atu nune’e sira hatene saida mak sira presiza ajuda husi relatoriu ne’e.

Nia informa, mandatu dahuluk nia hala’o servisu sei kolabora entindade hotu-hotu liu-liu lia nain sira, liurai sira, oinsa mak bele minimiza problema ne’ebe mosu iha postu administrativu Luro nian, nia hanoin dezenvolvimentu hotu-hotu bele la’o bainhira estabilidade ne’e di’ak, dalan di’ak liu mak ne’ebe uluk beiala sira uza mak hanesan asaun dame, tanba ne’e mak nia bolu ona lider hotu-hotu parte igreja ho lia nain sira
Augusto dehan, Asaun dame halo ne’e komitmentu husi entidade hotu-hotu Luro oan sira nian konsege halo duni, depois halo hotu tiha oinsa mak husu nafatin entidade hotu-hotu liu-liu ba sira parlemtu foin sae no NGO sira ne’ebe servisu hamutuk ho sira oinsa mak bele fo formasaun oioin ba sira bele servisu hamutuk tanba servisu ida ne’e atu sustenta ba familia uma laran, hakmatek ona labele mete ona problema.

Entretantu, Parlamentu Foinsa’e Postu Administrativu Luro Zelfia de Jesus apresia, agradese no apresenta problema sosial sira ne’ebe foinsa’e sira iha postu Luro hasoru liu husi rezolusaun ne’ebe Parlamentu Foinsa’e aprova iha Plenaria Nasional Parlamentu Foinsa’e ne’ebe realiza iha munisipiu baukau iha loron 21-22/12/2022.
“Ami mai hodi apresenta problema ne’ebe joven sira hasoru iha postu Luro ba Administrador Postu Luro liliu eskola EBF Ailarino ne’ebe aat, konflitu sira ne’ebe mosu, ao mesmu tempu ami mos fo agrasede ba nia vontade no komitmentu tanba sempre apoia ami hodi hala’o ami nia atividade sira durante tinan tolu inklui Administrador Sesante Tomas Cabral no Delfim Markes, ami orgullu tanba ami aprende ho sira oinsa la’o ba oin no sai aspirador ba foinsa’e sira”. Zelfia Haktuir
Enkuantu, Parlamentu Foinsa’e Kinta Periodu nia mandata sei termina iha tinan ne’e, no sei rekruta hikas membru parlamentu foinsa’e periodu dalimak iha tinan ne’e.

Jornalista : Luis Pailofo
Editor : Augusto dos Santos